Innan við fjórir af hverjum tíu stuðningsmönnum Repúblikanaflokksins í Bandaríkjunum styðja rétt til hjónabands samkynhneigðra, samkvæmt nýrri könnun sem fjölmiðillinn Axios birti í dag. Könnunin náði til um þúsund manns.
Á sama tíma styður meirihluti Bandaríkjamanna hjónabönd samkynhneigðra, eða 65 prósent. Stuðningur Repúblikana hefur farið úr 55 prósentum árið 2021 í 37 prósent í dag. Meðal Repúblikana er stuðningurinn við hjónabönd samkynhneigðra álíka mikill í dag og hann var 2015. Meðal demókrata mælist stuðningurinn 87 prósent.
Samkynja hjónabönd hafa verið lögleg í Bandaríkjunum eftir ákvörðun hæstaréttar árið 2015. Síðustu ár hafa þingmenn úr röðum Repúblikana lagt hart að hæstarétti að snúa ákvörðuninni við. Tveir sitjandi hæstaréttardómarar hafa tekið undir slíkt.
