Bróðir Andra Más Mortensen Birgissonar gaf skýrslu á þriðja degi aðalmeðferðar í Reykholtsmálinu. Hann sagðist ekki hafa beitt brotaþola í málinu ofbeldi eða séð að því hafi verið beitt. Hann bar þó ítrekað fyrir sig minnisleysi.
Að lokum baðst hann undan skýrslutökunni þar sem hún reyndist honum of erfið.
Brotaþoli segir að hann hafi verið beittur ofbeldi af Andra og manninum sem kom með honum í fyrstu. Bróðirinn sagðist ekki muna eftir því að Andri eða Ingunn hefðu beitt manninn ofbeldi. Andri er sakaður um mikið ofbeldi en Ingunn er sökuð um að hafa slegið manninn með hnúajárnum. Brotaþoli sagði að bróðirinn hefði beitt sig ofbeldi að minnsta kosti einu sinni með því að slá sig en bróðirinn kannaðist ekki við það.
Allir sem eru ákærðir í málinu hafa nú komið fyrir dóm og gert er ráð fyrir að brotaþoli gefi skýrslu á morgun
Kallaður í Reykholt um miðja nótt
Bróðirinn sagði aðkomu sína að málinu vera þá að Andri Már hafi hringt í sig á laugardagsmorgni klukkan 4 og vakið hann. Andri Már hafi sagst vera í aðstæðum sem hann vildi alls ekki vera í og að hann þyrfti að ná í sig.
Hann hafi þá farið af stað í adrenalínsjokki. Áður en hann fór í Reykholt hafi hann náð í Ingunni, unnustu Andra Más, á Olís í Norðlingaholti.
„Svo mætum við þarna í Reykholt og þar er mikil móða,“ sagði hann og átti þá við að hann myndi ekki mikið. Andri Már hafi þó tekið af honum bíllyklana svo hann hafi ekki getað farið.
Hörmuleg lykt af blóði
Bróðirinn sagði að hann myndi ekki mikið eftir aðkomu á vettvangi. „Það eina sem ég man eftir er hörmuleg lykt af blóði,“ sagði bróðirinn sem kvaðst ekki hafa vitað hvaða aðstæður hann væri að fara í. Hann sagðist ekki hafa beitt brotaþola ofbeldi. Sækjandi sagði þó að brotaþoli teldi svo vera. Einnig sagðist bróðirinn ekki hafa orðið vitni að ofbeldi gegn brotaþola.
Hinn sextugi brotaþoli hafi átt erfitt með að hreyfa sig, tyggja og borða mat yfir höfuð. Bróðirinn segist nokkrum sinnum hafa rætt við brotaþola, þá um líf hans og fjölskyldu. Hann segist ekki vita af hverju hann talaði við hann. „Mér leið svakalega illa,“ sagði bróðirinn.
Bróðirinn kvaðst hafa vitað að brotaþoli mætti ekki fara úr húsinu sínu en bar einnig við að hann hefði ekki mátt fara heldur.
„Mig langaði bara að komast burt frá þessu,“
Bróðirinn kvaðst ekki hafa hjálpað brotaþola þar sem hann hafi verið mjög hræddur við Andra Má og að hann hafi talið að hann myndi valda sér eða kærustu sinni skaða ef hann aðstoðaði ekki.
Í húsinu hafi verið nokkuð af verkfærum, til dæmis keðjusög og hann hafi séð Andra halda á bæði stálpípu og hamri.
„Mig langaði bara að komast burt frá þessu,“ sagði bróðirinn sem sagði að hann hefði búið til lygasögu til þess að komast frá aðstæðunum að minnsta kosti tvisvar en hann hafi alltaf verið kallaður til baka, ýmist af Andra eða Ingunni.
Á einum tímapunkti hafi bróðirinn unnið skemmdir á sínum eigin bíl svo hann gæti ekki snúið aftur í Reykholt. Hann hafi þó lagfært það seinna meir og snúið þangað aftur.
„Hann átti bara að fara upp á spítala.“
Á mánudeginum eftir ofbeldið á heimili brotaþola segir bróðirinn að hann hafi aðstoðað við að koma honum í flug. Andri hafi fyrirskipað að bróðir hans skyldi sitja í miðju bílsins en að brotaþoli og Ingunn væru sitt hvoru megin við hann. Bróðirinn segir að hann hafi talið að maðurinn hefði ekki átt að vera færður úr húsinu.
„Hann átti bara að fara upp á spítala. Hann var ekki að labba eða borða. Hann átti bara að fara upp á spítala,“ sagði hann.
Bróðirinn lýsir ferðinni til Keflavíkur með brotaþola og sagði að nokkur stopp hefðu verið gerð á leiðinni, meðal annars heima hjá Andra þar sem töskur og fleira hefðu verið borin inn en einnig hefði verið stoppað við í búð sem selur rafrettur.
„Það næsta sem ég man eftir er að við erum lögð fyrir utan Símann,“ sagði hann. Hann kvaðst ekki hafa vitað hvers vegna þau voru þar.
Í ákæru segir að starfsmenn símaverslunar hafi verið blekktir til að gefa út rafræn skilríki fyrir brotaþola. Þau voru svo notuð síðar meir til að taka fé út af reikningum hans en einnig við kaup á flugmiða.
Þegar bróðirinn var spurður út í það hvort brotaþoli hefði fengið hjálp við að kaupa flugmiðana.
„Ég myndi ekki segja að þetta hafi verið að hjálpa,“ sagði bróðirinn við því.
„Hvað myndir þú kalla þetta þá?“ spurði saksóknari.
„Ofbeldi,“ svaraði bróðirinn þá.
Var og er hræddur við Andra Má
Eftir að brotaþoli hafi verið farinn úr landi segist bróðirinn muna eftir sér í Keflavík þar sem Andri Már hafi farið inn í hús félaga síns og verið ofurglaður.
Síðar meir hafi þau verið stöðvuð á Sæbrautinni af lögreglu þar sem Andri Már hafi keyrt of hratt. Bróðirinn sagðist hafa vitað til þess að Andri hefði drukkið fyrr um daginn. Hins vegar var þremenningunum sleppt með aðvörun.
Bróðirinn segir að vikan eftir að frelsissviptingin fór fram hafi verið í mikilli móðu. Hann viðurkenndi þó að hann hafi móttekið peninga eftir atvikið. Hann sagðist ekki hafa vitað að peningarnir hefðu borist ef reikningi brotaþola. Það hafi komið í ljós eftir að hann var handtekinn.
Hann viðurkenndi þó við spurningar sækjandans að hann hefði farið í hraðbanka til þess að láta Andra Má, bróður sinn, fá peninga. Einnig var honum kunnugt um að Andri Már hefði keypt dýra hluti, líkt og skartgripi, eftir að brotaþoli fór úr landi. Sjálfur sagðist hann ekki muna eftir því hvort hann hefði notað peningana sem hann fékk.
Þegar verjandi spurði bróðurinn um samband hans við Andra Má sagðist hann vera virkilega hræddur við hann, sérstaklega í dag. Hann lýsti tveimur atvikum þar sem Andri varð mjög reiður. Annars vegar þegar hann og Ingunn hafi rifist í tjaldútilegu og komið blá og marin úr tjaldi sínu.
Hins vegar þegar hann og fjölskylda hafi aðstoðað við að fjarlægja muni Andra úr íbúð sem hann dvaldi í ásamt fyrri barnsmóður sinni. Þegar Andra bar þar að garði hafi hann hótað föður sínum og öðrum og kastað í þau klökum og snjó og keyrt að þeim hótandi líkt og hann hafi ætlað að keyra yfir þau.
„Ef maður sagði vitlausan hlut við hann gat hann blossast upp í reiði,“ segir bróðir Andra.
Skýrslutakan reyndist of erfið
Hádegishlé var tekið áður en unnt var að klára skýrslu bróðurins.
Eftir hádegishlé spilaði ákæruvaldið upptökur af því þegar Andri Már reyndi á laugardegi að taka út peninga af korti brotaþola en pin-númerið reyndist rangt. Þar má heyra í Ingunni og bróðurnum reyna að fá pin-númer upp úr brotaþola.
Bóðirinn sagðist ekki muna eftir þessu.
Í annari upptöku frá því klukkan 20:19 sama dag, virðast bróðirinn og Andri Már vera að ræða um fjárhagsleg málefni brotaþola. Bróðirinn sagðist ekkert muna eftir þessu.
Hann sagðist þá finna fyrir ótta og bað um að tekið væri hlé. Skýrslutaka hélt ekki áfram þar sem bróðirinn kvaðst ekki treysta sér til að halda áfram. Verjandi hans sagði að umbjóðandi sinn hefði ekki heyrt rödd bróður síns, Andra Más, í að verða tvö ár og að það hefði djúpstæð áhrif á hann.
