Rúna Hauksdóttir Hvannberg, forstjóri Lyfjastofnunar, segir lög brotin með sölu á hunangi með stinningarlyfjum og efnum sem veita kannabisáhrif.
Engin leið sé að rekja uppruna lyfjanna.
Hún segir fólk geta stofnað heilsu sinni í hættu með neyslu á slíkum lyfjum.
Litli frændi fíkniefnisins Spice og hunang sem inniheldur stinningarlyf og heitir aukinni karlmennsku er til sölu á opnum íslenskum vefsíðum.
Allur gangur er á því hvort innihaldsefnin séu gefin upp.
Ómögulegt að vita við hvaða aðstæður lyfin voru framleidd
Í fréttum RÚV á fimmtudag kom fram að í mælingum réttarmeinafræðings hefðu greinst tvö stinningarlyf í hunanginu, annað þeirra reyndist vera virka efnið í Viagra.
„Ef það reynast vera, eins og kom fram í mælingunum, stinningarlyf í þessu hunangi, þá er það ólögleg sala,“ segir Rúna.
Hún segir að sala lyfja á vefsíðum sé háð ströngum reglum og sé bönnuð nema á löglegum vefsíðum apóteka.
Framleiðsla á lyfjum þarf að fylgja reglum og eftirliti.
Rúna segir ómögulegt að vita við hvaða aðstæður tiltekin lyf voru framleidd.
„En aðalatriðið er kannski að gera fólk meðvitað um það að það getur verið að stofna heilsu sinni í hættu með verslunum á svona síðum.“
Rúna segir áhrif þess að blanda stinningarlyfjum í hunang eða önnur fæðubótarefni vera algjörlega óþekkt.
Lyfjastofnun ekki með tiltekin mál til rannsóknar
Rúna segir tiltekin mál, sölu á Spice og hunangi með stinningarlyfjum, ekki vera á borði Lyfjastofnunar.
Hún segir það þeirra verkefni að birta leiðbeiningar um hvar fólk á að versla lyf og hvar ekki.
Hún segir það í höndum lögreglunnar að rannsaka vefsíður sem eru, án leyfis, að selja lyf.
Lyfjastofnun vinnur náið með tollinum við að stöðva smygl og sendingar á ólöglegum lyfjum.
„Ef þetta er á Facebook, þá höfum við tilkynnt Facebook þetta sjálfum sko. Vakið athygli þeirra á þessu. Þeir vilja ekki hafa ólöglegar sölur í sínu netverki sko.“
