Þetta segir segir Alexandra Jóhannesdóttir, fráfarandi sveitarstjóri á Skagaströnd. Frá því seint á árinu 2018 hefur hún gegnt því starfi, sem hún lætur nú af jafnhliða því sem ný sveitarstjórn tekur við. Árin fyrir norðan segir hún hafa verið góðan og lærdómsríkan tíma og þau séu gott veganesti í ný verkefni, hver sem þau verði.
„Á Skagaströnd, þar sem búa 470 manns, hafði ég aldrei komið þegar ég réði mig hingað til starfa, nýlega orðin þrítug og þá yngsti sveitarstjóri landsins. Ýmsum fannst nóg um, en það breyttist sem betur fer hratt þegar fólk fór að kynnast mér og mínum verkum,“ segir Alexanda þegar hún lítur til baka.
Rifjar þar upp að margt óvænt hafi gerst fyrstu mánuðina sem hún hafi verið í starfi og aðstæður verið krefjandi.
Krefjandi verkefni fyrstu árin
„Fyrstu tvö árin voru óvenju snúin. Í sama mánuði og ég hóf störf tilkynnti FISK Seafood að togarinn Arnar HU-1 myndi ekki landa lengur á Skagaströnd. Togaraútgerð, sem hafði verið undirstaðan í bæjar- og atvinnulífi var að leggjast af í bænum. Verkföll, veira og ofsaveður fylgdu í kjölfarið samhliða verulegum tekjusamdrætti. Það voru því ýmis úrlausnarefni sem þurfti að leysa án forskriftar,“ segir Alexanda.
Ánægjulegt er að mati sveitarstjórans að tekist hefur að snúa umræðunni um framtíð Skagastrandar úr óvissu yfir í tækifæri. Tíma hafi tekið að vinna sig í gegnum skaflinn þegar togaraútgerð í þorpinu var hætt. Þá hafi skipt miklu að skapa möguleika og ný tækifæri.
„Við höfum byggt Skagaströnd upp sem áhugaverðan ferðamannastað. Á Spákonufellshöfða hafa verið reist mjög eftirtektarverð mannvirki, meðal annars mjög óhefðbundið fuglaskoðunarhús og aðgengilegur göngustígur með litlum útsýnispalli. Fyrir mér snýst þetta ekki bara um mannvirki heldur að skapa upplifun, styrkja ímynd staðarins og laða hingað fólk sem sér verðmæti í náttúru, sögu og umhverfi Skagastrandar. Á þessum árum hefur líka verið mikið rætt um verkefni eins og baðlón og uppbyggingu hótels sem mikil tækifæri felast í,“ greinir Alexandra frá.
Fylla gömlu húsin lífi
Eitt stærsta málið í sveitarstjóratíð Alexöndru segir hún hafa verið þegar sveitarfélagið tók við hluta þeirra húseigna sem áður tengdust bæjarútgerðinni Skagstrendingi. Sú ákvörðun hafi verið umdeild, enda hafi eignirnar verið í slæmu ástandi og ljóst að mikill kostnaður myndi fylgja því að koma á fót starfsemi þar að nýju. Að mati stjórnenda sveitarfélagsins hafi þó verið ótækt að stórhýsi í miðju bæjarlandinu stæðu þar eins og draugar fortíðar til minningar um það sem einu sinni var. Því hafi verið settur kraftur í að koma húsunum aftur í not og fylla þau lífi, sem hafi líka tekist. Nú sé m.a. trésmíðaverkstæði í gömlu rækjuvinnslunni, skrifstofusetur og útibú Landsbankans þar sem skrifstofur Skagstrendings voru og búið að teikna hótel í síldarverksmiðjunni.
„Fjárhagsstaða sveitarfélagsins í dag er traust. Við höfum farið varlega í skuldbindingar og undirbúið framkvæmdir þannig að hægt sé að fara í þær án lántöku. Okkur hefur þó tekist að framkvæma ótrúlega mikið á síðustu árum án þess að skuldsetja sveitarfélagið. Stór hluti af starfi sveitarstjóra er hagsmunagæsla. Það felur í sér að skilja leikinn, kunna stjórnsýsluna, vita hvernig kerfin virka og geta talað máli sveitarfélagsins á skýran og trúverðugan hátt. Maður þarf að byggja upp tengsl og fylgja málum eftir af festu og þolinmæði,“ segir Alexandra.
Hlusta á raddir íbúa
Sveitarstjórinn segist alltaf hafa litið á ríkið og þær fjölmörgu stofnanir sem þar heyra undir sem bandamenn frekar en mótherja sveitarfélaganna. Þar geti auðvitað skapast togstreita milli ríkis og sveitarfélaga, sérstaklega þegar verkefni hafa sameiginlega snertifleti hvað varðar bæði fjármögnun og framkvæmd.
„En mín reynsla er sú að besti árangurinn næst þegar fólk nálgast verkefnin af gagnkvæmri virðingu og með það að markmiði að finna lausnir saman. Í þessu öllu þarf svo að vera jafnvægi; taka ákvarðanir af fagmennsku en gleyma samt aldrei hinum mannlega þætti. Sterkust eru viðbrögðin þegar sveitarfélagið beitir sér í málum sem hafa áhrif á líðan fólks og ánægju með bæinn sinn. Fólk vill auðvitað að stóru málin séu í lagi, en það upplifir samfélagið sitt fyrst og fremst í gegnum daglega umhverfið sitt og þjónustuna sem það fær. Því skiptir miklu að grunnþjónustan sé framúrskarandi. Að leikskólinn sé góður, að snjómokstur virki, að umhverfið sé snyrtilegt og að fólk fái svör. Finni að það sé hlustað á raddir þess,“ segir Alexanda um tímann á Skagaströnd sem nú er að renna út.
Áhrif á daglegt líf fólks
„Þegar ég sagði já við starfstilboði hér á Skagaströnd fyrir átta árum sá ég hér mikil tækifæri og fann strax að hér væri samfélag með styrk og framtíðarmöguleika. Mér fannst mikilvægt að taka þátt í að byggja upp bjartsýni og trú á staðinn; að sýna að lítil samfélög geta verið kraftmikil, metnaðarfull og full af tækifærum. Þegar ég eignaðist son minn fyrir tæpum þremur árum fann ég það sérstaklega sterkt hvað samfélagið hér stóð þétt við bakið á okkur og sýndi okkur mikinn kærleik, hlýju og stuðning. Það eru svona hlutir sem maður gleymir aldrei og minna mann á hversu dýrmætt það er að tilheyra samfélagi þar sem fólk hugsar hvert um annað. Fyrir það er ég þakklát. En annars er ég, þegar Skagaströnd sleppir, tilbúin í nýjar áskoranir og ný ævintýri. Sveitarstjórnarmálin eru skemmtilegur vettvangur og það sem hefur alltaf heillað mig mest við þau er hvað maður fær tækifæri til að hafa raunveruleg áhrif á daglegt líf fólks. Sjá hugmyndir verða að veruleika,“ segir Alexandra að síðustu.
Hver er hún?
Alexandra Jóhannesdóttir er fædd árið 1988. Hún er lögfræðingur að mennt og hefur starfað sem verkefnastjóri og lögfræðingur hjá Listahátíð í Reykjavík og Fiskistofu, gegnt fjölbreyttum stjórnunarstörfum og býr yfir umfangsmikilli reynslu úr stjórnsýslu og opinberri stefnumótun. Hún hefur einnig sinnt fjölmörgum trúnaðar- og stjórnarstörfum.
