Það varð skyndilega uppi fótur og fit í blaðamannamiðstöð leiðtogafundar NATO í Ankara á miðvikudagsmorgun, þegar Donald Trump settist niður með Mark Rutte framkvæmdastjóra NATO og tók nokkrar spurningar frá fjölmiðlum.
Streymið frá þessum viðburði var af einhverjum ástæðum ekki á þeirri sjónvarpsrás NATO sem flestir voru að horfa á - og skyndilega stukku allir til og opnuðu vefsíðu breska miðilsins Sky News; það er ekki ljóst hvaðan sá miðill fékk streymið, en þessum viðburði var allavega streymt í gegnum vefsíðu Hvíta hússins.
Og eins og venjulega, þá talaði Trump í fyrirsögnum eins og það er stundum kallað - fyrirsögnum sem rötuðu beint á helstu fréttaveitur heims, í rauðu letri, sem gefur til kynna fréttagildi þeirra.
Tökum AFP sem dæmi (Agence France Presse, sem birtir fréttir á nokkrum tungumálum, þar á meðal ensku); þar á bæ er venjulega byrjað á því að birta fyrirsögn, og nokkrum mínútum síðar fylgir svo meiri texti.
Svona leit fréttalisti AFP út á miðvikudagsmorgun, nokkrum mínútum eftir að blaðamannafundur Trump og Rutte hófst.
Það sem vakti auðvitað mesta athygli var það sem Trump hafði að segja um Íran; að frá hans bæjardyrum séð væri samkomulag um vopnahlé ekki lengur í gildi, en svo komu kunnuglegar umkvartanir um NATO og hin aðildarríkin eins og á færibandi.
„Ég er mjög óánægður með NATO útaf því sem þeir gerðu varðandi Grænland, og ég er ekki ánægður með NATO vegna þess að þeir vildu ekki hjálpa okkur með Íran...við þurftum svosem enga hjálp, en ég var að leggja fyrir þá próf og sjá hvort þeir myndu vera til staðar,“ sagði Trump og sagðist hafa talað við ráðamenn í nokkrum aðildarríkjum.
„En ég talaði ekki við Spán; það hefur ekkert upp á sig og við viljum ekki eiga nein viðskipti við Spán framar...Spánn er ferlegur félagi í NATO; þeir taka ekki þátt, þeir borga ekki og ég vil ekki hafa neitt með Spán að gera; viltu vera svo vænn að stoppa öll viðskipti við Spán,“ sagði Trump og virtist horfa til Scott Bessent, fjármálaráðherra Bandaríkjanna sem sat forsetanum á vinstri hönd.
Stjórnvöld á Spáni virðast hafa tekið þessum ummælum Trumps af stóískri ró, miðað við það sem embættismenn í Madrid sögðu við AFP fréttaveituna; mögulega til að ýfa ekki frekar upp forseta Bandaríkjanna, og talsmaður framkvæmdastjórnar Evrópusambandsins (sem fer með samninga um utanríkisviðskipti fyrir hönd aðildarríkja) sagði að Evrópusambandið ætlaðist til þess að Bandaríkjastjórn virti þá viðskiptasamninga sem í gildi eru milli ESB og Bandaríkjanna.
Það sama gilti um aðra leiðtoga; undirliggjandi skilaboð í ummælum þeirra virtist vera að það væri best að láta þessi ummæli Trumps sem vind um eyru blása; það væri nauðsynlegt að halda fókus á þau verkefni sem raunverulega skiptu máli.
Mette Frederiksen, forsætisráðherra Danmerkur sá sig hins vegar knúna til að svara Trump fullum hálsi, eftir að Bandaríkjaforseti endurnýjaði umræðuna um að Grænland ætti að tilheyra Bandaríkjunum
„Ég heyrði það sem Bandaríkjaforseti sagði...og afstaða Bandaríkjastjórnar er því miður skýr hvað þetta varðar. Okkar afstaða er sú sama og hún hefur alltaf verið; Grænland er að sjálfsögðu ekki til sölu,“ sagði Frederiksen þegar hún gekk inn á leiðtogafundinn.
Tilbúnir að taka stöðu með Danmörku á leiðtogafundinum
Uppsláttur og umkvartanir Trumps fyrir fundinn virðast hafa horfið eins og dögg fyrir sólu, þegar leiðtogarnir þrjátíu og tveir settust niður í ráðstefnuhöllinni í Ankara.
„Andinn á fundinum var mjög góður,“ sagði Kristrún Frostadóttir forsætisráðherra í viðtali við RÚV, þá nýkomin af leiðtogafundinum. Það sama sögðu aðrir leiðtogar bandalagsríkjanna, meira að segja Trump sjálfur. „Þetta var árangurríkur fundur,“ sagði Trump síðdegis á miðvikudag, og „það var mikil ástúð í þessum fundarsal,“ bætti hann við.
En hópur leiðtoga á fundinum var hins vegar tilbúinn að láta til sín taka, færi svo að Trump héldi áfram með málatilbúnað sinn hvað Grænland varðaði,
„Við vorum reiðubúin að taka okkur stöðu ef málefni Danmerkur og Grænlands kæmu til umræðu á fundinum,“ sagði Jonas Gahr Störe, forsætisráðherra Noregs á blaðamannafundi síðdegis eftir leiðtogafundinn, „og tökum ekki undir ummæli sem draga í efa að Grænland sé hluti af danska konungsríkinu“ sagði Störe við fjölmiðla.
Ekki kom fram hvaða önnur aðildarríki NATO Störe átti við með þessum orðum, en miðað við það sem leiðtogar Norðurlandanna, þar á meðal Kristrún Frostadóttir og aðrir sögðu um þetta mál, má búast við að þau og jafnvel fleiri hefðu fylkt sér að baki Dönum.
En Grænland kom ekki til umræðu á sjálfum fundinum. Þar virðast leiðtogarnir hafa einbeitt sér að því sem skiptir máli - að þétta raðirnar, ræða aukin framlög Evrópuríkja og Kanada til varnar- og öryggismála, efla hergagnaframleiðslu og tryggja áframhaldandi stuðning við Úkraínu.
