Mennta- og barnamálaráðuneytið hefur kynnt áform um ný námslok á framhaldsskólastigi sem meðal annars er ætlað að mæta þeim nemendum sem horfið hafa frá námi vegna námsörðugleika.
Áformin, sem snúa að þrenns konar breytingum á lögum um framhaldsskóla, voru kynnt í samráðsgátt stjórnvalda í morgun. Þar segir að fengin reynsla sýni fram á að þörf kunni að vera á að skýra og styrkja lagaumgjörð um framhaldsskóla enn frekar, einkum að því er varði námslok og stöðu tiltekinna námsúrræða.
„Við verðum að tryggja fjölbreyttari námsleiðir og mæta ólíkum þörfum og áhuga nemenda,“ segir Inga Sæland, mennta- og barnamálaráðherra, í samtali við mbl.is, rétt eins og hið háa brotthvarfshlutfall nemenda úr framhaldsskólanámi sé skýr áminning um.
Hinar fyrirhuguðu breytingar stefna í fyrsta lagi að því að innleiða ný námslok á framhaldsskólastigi sem eru sérstaklega hugsuð fyrir nemendur sem þurfa einstaklingsmiðaðra, hagnýtara og sveigjanlegra nám en núverandi leiðir til námsloka gera ráð fyrir.
Tryggi raunhæfa leið til námsloka við hæfi
Þessari nýju námslokaleið er ætlað að tryggja að nemendur sem ekki stefna að hefðbundnum námslokum eða þurfa aukinn stuðning í námi eigi raunhæfa leið til námsloka við hæfi, auk þess að auka virkni nemenda og styrkja tengsl náms við atvinnulíf.
Þá er áformunum einnig ætlað að skýra hlutverk starfsbrauta fyrir nemendur með fötlun, skilyrði fyrir innritun á þær og stöðu þeirra í lögunum, enda þörf á því að uppfæra löggjöfina þannig að hún endurspegli betur raunverulega framkvæmd.
Í þriðja lagi miða áformin að því að marka fjarnámi skýrari lagaumgjörð með því að kveða skýrar á um framkvæmd fjarnáms á framhaldsskólastigi, þar á meðal ábyrgð skóla og stöðu nemenda.
Ætlað að stemma stigu við brotthvarfi
Einn mælikvarði á árangur áformanna, verði þau að lögum, verður að fylgjast með þróun brotthvarfs þeirra nemenda sem breytingarnar beinast sérstaklega að frá námi á framhaldsskólastigi.
Fjallað hefur verið um þróun brotthvarfs nemenda á framhaldsskólastigi frá námi á vettvangi Morgunblaðsins og mbl.is, en þar kemur meðal annars fram að brotthvarf á Íslandi er það hæsta innan Evrópu og hefur staðið í stað á undanförnum árum í stað þess að fara lækkandi eins og þróunin hefur verið innan Evrópu.
Finna lausnir fyrir þá sem finna sig ekki
Í samtali við mbl.is setur Inga áformin í samhengi við hið háa brotthvarfshlutfall íslenskra nemenda frá námi á framhaldsskólastigi, og segir að taka verði betur utan um þá nemendur sem flosni frá námi vegna hvers kyns örðugleika við bóknám.
„Við erum með augun á boltanum og þetta er eitthvað sem að ég lít mjög alvarlegum augum,“ segir hún og bætir því við að sjálf hafi hún lagt áherslu á að finna lausnir fyrir þá nemendur sem flosna frá námi og finna sig ekki.
„Getum við boðið þeim einhverja aðra möguleika, önnur tækifæri? Vegna þess að það liggur alveg fyrir að þeir sem eru að útskrifast með svona slæman lesskilning eftir tíu ára grunnskólagöngu eiga mjög erfitt uppdráttar í öllu því sem lýtur að bara bóknámi,“ segir hún enn fremur.
