Þau níu ríki heims sem búa yfir kjarnorkuvopnum vörðu 119 milljörðum dala í slík vopn í fyrra. Það eru nærri 15 þúsund milljarðar króna.
Á milli ára jukust útgjöldin um 17 milljarða dala, rúmlega 2.000 milljarða króna, og hafa aldrei verið meiri.
Þetta kemur fram í nýrri skýrslu frá ICAN. Það eru samtök sem berjast gegn kjarnorkuvopnum. Þau hlutu friðarverðlaun Nóbels 2017.
Skýrsluhöfundur segist „skelfingu lostin“
Susi Snyder, meðhöfundur skýrslunnar, segir að þessi stækkun á vopnabúrum kjarnorkuveldanna sé áhyggjuefni. Því til viðbótar hafa skýrsluhöfundar varað við því að notkun gervigreindar geti aukið hættuna á því að kjarnorkuvopnum verði beitt.
„Ef ég á að vera alveg hreinskilin, þá er ég skelfingu lostin,“ segir Snyder við AFP-fréttaveituna. Skýrsluhöfundar vara við því að nýtt kjarnorkukapphlaup sé runnið upp.
Útgjöld jukust hjá öllum ríkjunum níu
Öll kjarnorkuríkin níu vörðu meira fé í kjarnorkuvopn í fyrra en árið á undan. Þetta eru Bandaríkin, Bretland, Frakkland, Indland, Ísrael, Kína, Norður-Kórea, Pakistan og Rússland.
Bandaríkin eyddu mestu í kjarnorkuvopn, og raunar meira en öll hin ríkin til samans, eða rúmlega 69 milljörðum dala, rúmlega 8.600 milljörðum króna. Það er rúmlega fimmtungsaukning á milli ára.
„Féð sem þessi ríki vörðu í kjarnorkuvopn árið 2025 hefði getað kostað starfsemi Sameinuðu þjóðanna í 32 ár,“ segir Snyder. Hún bætir því við að útgjöldin fyrir hvern dag á síðasta ári hefðu nægt til að tryggja fæðuöryggi yfir tveggja milljóna manna.
