Ísraelskum yfirvöldum er legið á hálsi að hafa framið sjórán og brotið gegn alþjóðalögum með því að stöðva Sumud-flotann með hjálpargögn til Gaza á alþjóðlegu hafsvæði nærri Grikklandi.
Sú ákvörðun Ísraelshers að stöðva för flotans og handtaka almenna borgara á Miðjarðarhafi, hátt í þúsund kílómetra frá Gaza, markar hættulega og óvenjulega stigmögnun, að mati skipuleggjanda.
Ísraelskir herbátar stöðvuðu flotann, sem ber neyðarbirgðir fyrir íbúa Gaza, nærri grísku eynni Krít aðfaranótt fimmtudags. Skipuleggjendur segja áhöfninni hafa verið rænt.
Ísraelar tilkynntu í gær að 175 aðgerðarsinnar hefðu verið handteknir á meira en tveimur tugum báta en skipuleggjendur segja 211 í haldi, þar á meðal fulltrúi í borgarráði Parísar, Raphaelle Primet að nafni.
Fólkið flutt til Grikklands
Ísraelski utanríkisráðherrann Gideon Saar sagði fólkið verða flutt að landi í Grikklandi og þakkaði þarlendum stjórnvöldum fyrir að vilja taka við því. Stjórnvöld nokkurra Evrópuríkja segjast fylgjast áhyggjufull með framvindu mála og ítölsk stjórnvöld krefjast frelsunar þeirra 24 ríkisborgara sem ólöglega hafi verið teknir höndum.
Spænski forsætisráðherrann Pedro Sanchez sagði Ísraelsmenn enn einu sinni hafa brotið gegn alþjóðalögum með því að ráðast gegn borgaralegum flota á alþjóðlegu hafsvæði, langt utan eigin lögsögu.
Ísraelski forsætisráðherrann Benjamín Netanjahú sagði aðgerðirnar hafa heppnast fullkomlega og fullyrti að aðgerðarsinnarnir væru stuðningsfólk Hamas. Tyrkneska utanríkisráðuneytið fordæmdi athæfi Ísraela og sagði það jafngilda sjóráni og vera brot á alþjóðalögum.
Um það bil 70 bátar með hátt í þúsund manns innanborðs lögðu upp frá Spáni, Frakklandi og Ítalíu snemma í apríl og hugðust rjúfa herkví Ísraela um Gazaströnd sem hefur varað frá árinu 2007 þegar Hamas komst til valda.
Það rökstyðja ísraelsk stjórnvöld með því að þannig megi hindra vopnainnflutning en gagnrýnendur segja herkvína valda saklausum Palestínumönnum ómældum þjáningum. Um það bil 30 bátar Sumud-flotans stefna enn hraðbyri í átt að Gaza að sögn AFP-fréttaveitunnar.
