Á Teigarhorni árið 1939 var hitamet Íslands sett þegar hiti náði 30,5 stigum.
Einar Sveinbjörnsson veðurfræðingur segir það ekki útilokað að metið verði slegið á Austurlandi á morgun.
Samkvæmt spákortum rekur svokallaða 564 dekametra þykktarlínu inn á Austurland frá því síðdegis í dag og fram í fyrramálið, skrifar Einar á Facebook.
Þykktin milli 1000- og 500 hPa-flatanna er mælikvarði á hita loftsins í neðri hluta lofthjúpsins. Því meiri þykkt, því hlýrra loft.
Þykkt á bilinu 564–565 dekametrar er fremur fátíð hér á landi og sást síðast í eftirminnilegum hlýindum fyrir austan 24. og 25. ágúst 2021, þegar 29,4 stig mældust á Hallormsstað.
Sólin gegnir lykilhlutverki
Þá er hita í 850 hPa-fletinum, í um 1.400 metra hæð, spáð yfir 16 stigum fyrir austan á morgun, sem er með því allra hæsta sem sést hér á landi.
Svo hár hiti í þessari hæð er oft merki um niðurstreymi lofts sem hlýnar skarpt á leið sinni niður.
Sólskinið gegnir einnig lykilhlutverki, bæði við að hita yfirborðið og við að blanda hlýja loftinu úr efri lögum niður. Skýjað er fyrir austan í dag en spáð er að létti til í fyrramálið.
Minna en 50% líkur á meti
Á móti kemur að sólin er nú lægra á lofti en við sumarsólstöður, þegar metið var sett árið 1939.
Þá staldrar hlýjasta loftið við yfir nóttina og snemma morguns, en eftir hádegi á morgun dregur heldur úr hitagæðum og spáð er háskýjabreiðu frá miðjum degi sem dregur úr upphitun sólar síðdegis.
„Að framansögðu tel ég og þrátt fyrir allt minna en 50% líkur á að hámarkshiti landsins á viðurkenndum hitamæli á morgun fari yfir 30,5°C. En það gæti hæglega mælst mest 28 til 30°C. Myndi þá giska á staði eins og Seyðisfjörð eða Borgarfjörð eystri, svona til að nefna einhverja,“ segir Einar í færslu á Facebook.
