Fiskistofa hefur afturkallað vigtunarleyfi Ísfélagið á Þórshöfn í hálft ár frá og með 1. júní vegna rofs á innsigli á hugbúnaði vigtar, segir í ákvörðum að „átt hafi verið við“ vigtina og framið hafi verið brot sem „leiði bersýnilega til að afli yrði ranglega skráður“. Ísfélagið hafnar því alfarið að átt hafi verið við vogina, það sé ekki til hagsbóta til lengri tíma en Fiskistofa segir það hlutverk vigtarmanns að ganga úr skugga að innsigli á hugbúnaði sé ekki rofið.
Samkvæmt ákvörðun Fiskistofu hófst málið í lok janúar í fyrra þegar veiðieftirlitsmenn fylgdust með endurvigtun á þorski úr skipinu Sigurbjörgu í umsjá löggilts vigtarmanns, þegar eftirlitsmennirnir skoðuðu vigtina nánar kom í ljós að innsigli á hugbúnaði vigtarinnar var rofið og stilling önnur en samkvæmt löggildingarmiða.
Steig sjálfur á vigtina
Þegar afla er landað þá er hann vigtaður með ís á hafnarvigt, svo er hann endurvigtaður án íss til að hægt sé að reikna hversu mikinn kvóta á að draga frá og hversu mikið sjómenn eiga að fá greitt. Eftirlitsmaðurinn, sem sjálfur vegur 95 kíló, steig á vigtina og upp kom að hann sé 88 kíló. Notast var við aðra vigt sem var á staðnum til samanburðar og sýndi sú vigt að meðaltali 6,6 prósent lægri þyngd en sú sem hafði verið notast við.
Lögregla fjarlægði ólöggiltu vigtina og var henni komið til Akureyrar á starfsstöð Fiskistofu, þar hafi niðurstaðan alltaf verið sú sama, hún vigtaði alltaf um 6 til 7 prósentum minna en aðrar vigtir. Farið var með hana til Akraness þar sem fulltrúar Fiskistofu, lögreglu og Húsnæðis- og mannvirkjastofnunar voru viðstaddir nánari skoðun. „Við þá skoðun hafi komið í ljós að vigtin vigtaði vitlaust og að átt hafi verið við hana og að tengiboxið fyrir kraftnemana hafi ekki verið innsiglað með límmiða,“ segir í ákvörðuninni.
Farið var með vigtina til Marel, þar segir að ekki hafi verið átt við tengiboxið en komið hafi í ljós að vigtin var stillt á 7 kílóa kvörðun. „Hafi sérfræðingar JBT Marel verið sammála um að átt hafi verið við vogina eftir síðustu löggildingu miðað við stöðu hugbúnaðar innsigla, sem voru rofin,“ segir í ákvörðuninni.
Hafi enga hagsmuni af því að hagræða mælingum
Í bréfi sem Fiskistofu barst í október frá lögmanni Ísfélagsins segir að ekki hafi verið gætt meðalhófs og hlutlægni. Farið var fram á aðra rannsókn á málinu og að fulltrúar Ísfélagsins verði viðstaddir til að koma á framfæri sjónarmiðum sínum og gæta hagsmuna sinna. Ákvörðunin sé íþyngjandi fyrir Ísfélagið og að Fiskistofa hafi við rannsóknina gengið út frá því að átt hafi verið við vogina.
„Málsaðili segir sig hana enga hagsmuni af því að hagræða mælingum þegar afli sé vigtaður enda myndi slík háttsemi leiða til stórtjóns fyrir félagið og væri í andstöðu við grunnreglur starfsemi þess,“ segir í bréfi lögmannsins, þar að auki yrði starfsmaður hafa hagsmuni af slíku þar sem það myndi leiða til tafarlauss brottrekstrar. Það sé einnig möguleiki að sögn Marel að skekkja gæti myndast án þess að starfsmaður kæmi þar að, til dæmis með skemmdum á vélbúnaði.
Í ákvörðun Fiskistofu segir að ekki sé hægt að sjá hvenær innsigli var rofið eða hvað varð til þess að innsiglið rofnaði. Ekki sé þörf á því að sanna hvernig „átt hafi verið við“ vigtina heldur sé það Ísfélagsins að ganga úr skugga um að vigtin uppfylli öll skilyrði löggildingar.
