Rannsóknir benda til þess að seinkun á upphafi skóladags í framhaldsskólum um 30 til 60 mínútur geti bætt svefn, minnkað dagsyfju og stutt við betri líðan nemenda.
Þetta kemur fram í svari Ingu Sæland, mennta- og barnamálaráðherra, við fyrirspurn Dags B. Eggertssonar, þingmanns Samfylkingarinnar, um upphaf skóladags í framhaldsskólum.
Kemur vel til greina
„Ráðherra er mjög umhugað um velferð nemenda og er góður svefn mikilvægur hluti af líðan þeirra og námsgetu. Því er ráðherra hlynntur því að framhaldsskólar hefjist ekki of snemma og telur það vel koma til greina að framhaldsskólar hafi sveigjanlegra upphaf skóladags,“ segir í svarinu.
Þá segir að formlegt samráð eða samtal hafi enn ekki átt sér stað. Greiningar á möguleika þess að seinka upphafi skóladags í framhaldsskólum hafa ekki verið unnar.
„Í Handbók um geðrækt í framhaldsskólum, sem Embætti landlæknis hefur gefið út í tengslum við verkefnið Heilsueflandi framhaldsskólar, er að finna tilvísun í rannsóknir sem styðja það að nætursvefn ungmenna verði betri ef upphafi skóladags er seinkað og rík áhersla lögð á að framhaldsskólar líti til þess í skipulagi skólaársins,“ segir í svarinu.
Full ástæða til að skoða samgöngur
Samkvæmt skýrslu Eflu um álagsdreifingu umferðar á höfuðborgarsvæðinu sem unnin var fyrir Samtök sveitarfélaga á höfuðborgarsvæðinu, kemur meðal annars fram að dæmi séu um að ferðatími fólks á höfuðborgarsvæðinu á morgnana lengist um 30 mínútur á mestu álagspunktum þegar framhalds- og háskólar hefjast á haustin.
„Ekki hefur verið mótuð sérstök miðlæg samgöngustefna fyrir framhaldsskóla en ráðherra telur fulla ástæðu til að það verði skoðað,“ segir í svari Ingu.
