Héraðsdómur Reykjaness hefur sýknað Icelandair af rúmlega 1,2 milljóna króna kröfu Ljónsstaða ehf. vegna flugröskunar sem varð í árshátíðarferð starfsmanna fyrirtækisins til San Francisco árið 2019. Ljónsstöðum var jafnframt gert að greiða Icelandair 800 þúsund krónur í málskostnað en fyrirtækið sérhæfir sig í bílaviðgerðum.

Fyrirtækið hafði keypt flug fyrir tólf starfsmenn sem héldu til San Francisco í byrjun nóvember 2019. Heimflug hópsins 11. nóvember var fellt niður vegna veðurs og daginn eftir reyndist flugvélin fullbókuð. Fyrirtækið þurfti því að greiða fyrir gistingu og uppihald starfsmannanna í tvo sólarhringa auk þess sem þeir komust ekki til vinnu á tilsettum tíma.

Í janúar 2020 viðurkenndi Icelandair bótaskyldu vegna röskunarinnar og bauð 600 evrur í bætur fyrir hvern farþega, samtals 7.200 evrur. Einnig var boðið upp á gjafabréf að verðmæti 780 evrur fyrir hvern farþega.

Ljónsstaðir óskuðu eftir peningagreiðslu auk endurgreiðslu útlagðs kostnaðar en greiðslan fór aldrei fram. Fyrirtækið hafði næst samband við Icelandair árið 2023 og kvað Covid-faraldurinn meðal annars hafa orðið þess valdandi að málið féll niður á milli.

Dómurinn komst að þeirri niðurstöðu að krafa Ljónsstaða hefði verið fyrnd þegar málið var höfðað í janúar 2026. Samkvæmt þágildandi lögum gilti tveggja ára fyrningarfrestur og varð fyrningu aðeins slitið með málshöfðun.

Ljónsstaðir hefðu því þurft að höfða mál fyrir 14. nóvember 2021. Viðurkenning Icelandair á bótaskyldu breytti því ekki og var félagið því sýknað af kröfunni.