Í góðum jeppafíling í Mijas - MBL.IS

Förinni var heitið í beinu flugi með Icelandair til Malaga við Miðjarðarhafið en fyrir þá sem ekki þekkja þá teygir fjöldi þekktra áfangastaða sig eftir allri ströndinni og upp í fjöllin, staðir eins og Marbella, Granada og Torremolinos.

Svæðið gengur í daglegu tali undir nafninu Costa Del Sol sem margir sóldýrkendur þekkja mæta vel.

Bíllinn er rúmgóður og það var gott að sitja í leðursætunum aftur í.

Sómdi sér vel í öllum aðstæðum

Í kynningum, sem haldnar voru í hæðunum fyrir ofan bærinn Fuengirola, í Mijas nánar tiltekið, lofaði Toyota meiri þægindum, bættum aksturseiginleikum og aukinni skilvirkni á sveitavegum, í langferðum og á götum borga.

RAV4 var í boði til reynsluaksturs og kynningar í fleiri en einni útgáfu. Þannig var bæði hægt að prófa aldrifsútgáfu og framhjólaútgáfu, og velja um tvinn- eða tengiltvinn. Ég og ferðafélagi minn töldum nóg að prófa tengiltvinn-aldrifsbílinn enda er það hann sem Íslendingar kjósa öðrum fremur.

Í Mijas var landslagið kjörið til reynsluaksturs. Við tóku skemmtilegir hol- og hæðóttir sveitavegir sem reyndu oft bara nokkuð vel á bifreiðina. Inn á milli var skotist inn á malbikaða vegi utan í fjallinu eða úti á hraðbraut. RAV4 sómdi sér vel í öllum þessum aðstæðum, hvort sem var á hægu tölti eða á harðaspani.

Hótelið, La Zambra Mijas, sem gist var á státaði af tígullegum átján holu golfvelli sem blasti við manni af hótelbarnum.

La Zambra var þekkt hér fyrr á árum, áður en það varð gjaldþrota og lagðist í eyði. Fjárfestar reistu það úr rústum fyrir nokkrum árum. Eitt af því sem hótelið státar af frá fyrri tíð eru til dæmis tengsl við bresku rokkhljómsveitina Rolling Stones sem vandi komur sínar á næturklúbb gististaðarins og hanga myndir á veggjum sem styðja þá frásögn.

Minnkar titring

Áður en ekið var af stað fengum við stutta kynningu úti á gangi frá einum Japananna sem mættir voru á staðinn frá höfuðstöðvunum. Stöðugt er leitað leiða til að bæta aksturseiginleika bílsins og upplifun ökumanns og farþega. Í þessu tilviki sagði maðurinn okkur t.d. frá því hvernig stykki hefði verið bætt við undir bílinn að framan til að minnka titring.

Ég var fljótt kominn í torfærur á leið minni um fjallahéruð Mijas sem okkur báðum, mér og bílnum, líkaði vel. Þarna kom til dæmis sérstök brekkustýring bílsins að góðum notum. Það var ekki laust við að maður kæmist í góðan jeppafíling.

Bíllinn sómdi sér vel í þessum umhverfi baðaður sólarljósi. Hann er orðinn allur straumlínulagaðri og manni finnst eins og hann sé viljugri fyrir vikið að takast á við hvert það verkefni sem fyrir hann er lagt.

Þessi nýja tengiltvinnútgáfa dregur 130 kílómetra á rafmagni við bestu aðstæður en alltaf a.m.k. eitt hundrað kílómetra.

Miðsvæðið hefur fengið andlitslyftingu. Einfalt er að skipta um gír.

Mest seldi jepplingurinn

Frá þessu og öðru sögðu þau okkur þau Tatsuya Kumegawa aðstoðaryfirverkfræðingur, markaðsstjórinn Mikio Hayashi og þróunarstjóri Toyota Gazoo Razing, Teruyuki Minami. Gazoo Racing er kappakstursarmur Toyota. Hægt er að fá bílinn í gæjalegri Gazoo Racing-múnderingu sem svíkur engan.

Natalia Bnatova verkefnastjóri í almannatengslum hjá Evrópudeild Toyota fór yfir helstu tölur í sinni kynningu eftir að við vorum snúnir heim af vegunum eftir ánægjulegan akstur.

Bíllinn er eins og fyrr sagði bæði mest seldi jepplingurinn í Evrópu og í heiminum öllum. 2,5 milljónir tækja hafa selst í Evrópu á þeim þrjátíu árum sem bíllinn hefur verið á markaðnum og fimmtán milljónir bíla í heiminum öllum. Bíllinn er jafnframt söluhæsti bíll í heimi árið 2025 með um milljón seld eintök. Þær tölur segja allt um gæði bílsins og hve vel hann höfðar til almennings.

Í erindi sínu á hótelinu sagði Kumegawa frá sýn Toyota en grunngildi Toyota RAV4 eru: Fara allt, gera hvað sem er (e. Core Values: Go Anywhere, Do Anything).

Verkfræðingurinn sagði að bifreiðin ætti að höfða til fólks sem lifði nútímalegu lífi. Það að geta farið hvert sem væri á ökutækinu gæfi fólki sjálfstraust. Að geta gert hvað sem væri þýddi að bíllinn lagaði sig að öllum aðstæðum.

4 sinnum hraðvirkari

Japanarnir fóru yfir margvíslega nýja virkni og snjalla tækni í bílnum. Þar á meðal uppfærða upplýsingaskjáinn í miðjunni sem nú er 12,9 tommur, fjórum sinnum hraðvirkari og býr yfir átta sinnum meira minni.

Drifkerfið hefur allt fengið yfirhalningu í þessari nýju útgáfu, allt frá batteríi til vélar og hleðslutíminn heldur áfram að minnka í takt við nýjustu tækni. Nú er hægt að hlaða tengiltvinnbílinn á 30 mínútum frá 10% í 80%.

Eitt af því sem mér finnst jákvætt í bílaþróun er hvað gírskiptingin verður sífellt einfaldari. Allt frá því að vera skipun í skjá, lítil sveif í stýri eða handhægar sveifar milli sæta. Það er einmitt raunin með RAV4. Þú ýtir brík fram og til baka til að skipta um gír.

Hægt er að fá RAV4 með glerþaki.

Geymsla er góð milli sæta og auðvelt að henda þar niður heilu vatnsflöskunum þó að þær eigi sitt hefðbundna pláss milli sæta og í hurðum.

Stýrið, sem nú hefur hita allan hringinn, hefur verið lækkað um 4 sentimetra sem gefur betra útsýni fram á veginn og á mælaborðið.

Ég veit ekki hversu mikið almenningur notar mismunandi akstursstillingar en fyrir þá sem hafa gaman af slíku er í boði snjó- og utanvegastilling m.a.

Hægt er að hlaða tvo síma þráðlaust á hentugum stað, en USB-tengi eru einnig í boði fyrir þá sem kjósa gömlu góðu snúruhleðsluna.

Staðan á markaði

Gervigreindin ryður sér sífellt meira til rúms. Hér geturðu til dæmis ávarpað hana og spurt um nýjustu stöðu á hlutabréfamarkaði, hvernig veðurspáin er og fleira. Þessi einkaþjónn er orðinn mun viðbragðsbetri og snallari en í eldri útgáfum, þó að þetta sé enn ekki eins og að tala við lifandi manneskju.

Dráttargetan er tvö tonnn sem ætti að duga í flest hjól- og fellihýsi á Íslandi.

RAV4 er bíll sem bæði lúkkar vel og skilar sínu enda liggur bæði mikið hugvit og áratuga reynsla að baki sem skilað hefur sér í miklum vinsældum í gegnum tíðina.