Af hverju vekur það sterkari viðbrögð þegar hælisleitandi fremur hrottalegt ofbeldisbrot en þegar innfæddur einstaklingur gerir slíkt hið sama?
Þessari spurningu var velt upp í viðtali Frosta Logasonar við Margréti Valdimarsdóttur, doktor í afbrotafræði við Háskóla Íslands, þar sem rætt var um innflytjendur, afbrot og viðbrögð samfélaga við alvarlegum ofbeldisbrotum.
Tilefnið var nýlegt mál á Írlandi þar sem hælisleitandi frá Afríku er sakaður um að hafa ráðist á mann á almannafæri og reynt að afhöfða hann. Frosti benti á að þegar slík mál komi upp sé algengt að bent sé á að innfæddir fremji einnig hrottaleg afbrot.
„Fólk segir: heyrðu, hvítir menn afhöfða líka fólk. En það er einhvern veginn ekki nógu gott svar,“ sagði Frosti í viðtalinu.
„Við upplifum þetta öðruvísi“
Margrét tók undir að slík mál hefðu sérstök áhrif á almenning.
„Auðvitað hefur þetta önnur áhrif á okkur tilfinningalega,“ sagði hún og benti á að fólk upplifi hælisleitendur sem einstaklinga sem samfélagið hafi tekið á móti, veitt húsaskjól og framfærslu. Þegar einhver úr þeim hópi fremur síðan alvarlegt ofbeldisbrot verði viðbrögðin eðlilega sterk.
Á sama tíma lagði hún áherslu á að afbrotafræðingar reyndu að skoða stærri myndina.
„Einhver eins og ég vill skoða tölfræðina,“ sagði hún og benti á að einstök mál, hversu alvarleg sem þau væru, segðu ekki endilega alla söguna um þróun afbrota eða ákveðna hópa.
Árekstur milli upplifunar og tölfræði
Viðtalið varpar ljósi á árekstur sem sífellt oftar kemur upp í umræðu um innflytjendamál í Evrópu.
Annars vegar eru sérfræðingar sem leggja áherslu á að skoða heildarmyndina og tölfræðilega þróun yfir langan tíma. Hins vegar eru margir almennir borgarar sem horfa á einstök ofbeldismál og spyrja hvort þau séu merki um kerfisbundinn vanda sem stjórnvöld hafi vanmetið.
Frosti benti á að þegar hælisleitandi, sem nýtur verndar og stuðnings samfélagsins, fremur sérstaklega hrottalegt ofbeldisbrot sé skiljanlegt að almenningur upplifi það með öðrum hætti en þegar um er að ræða innfæddan brotamann.
Margrét hafnaði þeirri upplifun ekki, en sagði mikilvægt að láta ekki einstök mál ein ráða ferðinni þegar metin væru áhrif innflytjenda á afbrotatíðni í heild.
Þú getur séð brot úr þessu samtali Margrétar og Frosta Logasonar hér að neðan. Viljir þú sjá allt viðtalið mælum við áskrift á Brotkast.is
