Við ætlum að ljúka þessari fréttavakt um hantaveirusmit um borð í skemmtiferðaskipinu Hondius. Kærar þakkir fyrir samfylgdina í dag, í lokin kemur hér smá samantekt:
- Skipið er farið af stað frá Grænhöfðaeyjum.
- Búist er við að það komi til Tenrife á laugardag.
- Þrír farþegar voru fluttir frá borði í dag, búið er að staðfesta smit hjá tveimur
- Spænsk stjórnvöld samþykktu að taka við skipinu en forseti Kanaríeyja er ekki ánægður með það.
- Af átta tilfellum sem tengjast Hondius hafa fimm verið staðfest.
- Samkvæmt áætlun á skipið að koma hingað til lands síðar í mánuðinum en óvíst er hvort af því verður.
Skipið Hondius er farið af stað. Það siglir nú frá Grænhöfðaeyjum til Kanaríeyja. Siglingin tekur um það bil þrjá sólarhringa og búist við því að Hondius leggist að bryggju á Tenerife á laugardag.
Staðfest hantaveirusmit tengd skemmtiferðaskipinu Hondiusi eru nú orðin fimm, þetta segir fulltrúi WHO á Grænhöfðaeyjum Ann Lindstrand.
„Af öllum tilfellum sem tengjast skipinu, þessi átta tilfelli, höfum við staðfest fimm,“ segir Lindstrand.
Hollenska flugfélagið KLM staðfestir að konu sem lést í Suður-Afríku þann 26. apríl hafi verið vísað frá borði vélar félagsins daginn áður.
Hjón frá Hollandi sem voru um borð í Hondius létust bæði. Maðurinn lést 11. apríl og eiginkona hans flaug til Jóhannesarborgar í Suður-Afríku 24. apríl. Ástand konunnar versnaði svo 25. apríl og hefur hún farið um borð í flugvél KLM sem var á leið til Amsterdam.
„Áhöfnin ákvað að leyfa farþeganum ekki að ferðast vegna heilsufars á þeim tíma,“ segir í yfirlýsingu KLM.
Monica Garcia, heilbrigðisráðherra Spánar, sagði á fundi með fréttamönnum að þegar einstaklingar með einkenni væru farnir frá borði á Grænhöfðaeyjum héldi skipið áfram til Kanaríeyja.
„Það á að koma til hafnar eftir þrjá sólarhringa í varahöfn Granadilla de Abona. Það er róleg varahöfn í um tíu mínútna fjarlægð frá flugvellinum á Tenerife,“ sagði Garcia og á þar við Tenerife Sur-flugvöllinn sem margir Íslendingar þekkja.
Associated Press greinir frá því að við rannsókn á upptökum smitsins sé aðaltilgátan sú að hollenskt par hafi smitast í fuglaskoðun í argentínsku borginni Ushuaia áður en þau fóru um borð í Hondius.
Parið er sagt hafa komið við á urðunarstað þar sem mögulegt er að þau hafi komist í snertingu við nagdýr. Rannsóknin er enn í gangi og þetta er aðeins tilgáta.
Hér að neðan má sjá kort af leið Hondiusar. Ferðin hófst í Argentínu, skipið er nú við Grænhöfðaeyjar og stefnir til Tenerife. Siglingin frá Grænhöfðaeyjum til Tenerife tekur um þrjá sólarhringa.
Upplýst hefur verið um átta staðfest eða grunuð smit:
- Þrjú eru látin, hollensk hjón og þýskur karlmaður
- Einn er á sjúkrahúsi í Sviss
- Breskur karlmaður er á sjúkrahúsi í Suður-Afríku, ástand hans er sagt stöðugt
- Þrír voru fluttir frá borði í morgun, tveir úr áhöfn og einn farþegi
Það eru samtals yfir 140 manns um borð í Hondius. Farþegar eru um 80 og frá 15 mismunandi löndum. Meirihluti starfsfólks kemur frá Filippseyjum.
Reuters ræddi við farþega um borð í morgun. Hann segir að skipstjórinn haldi þeim vel upplýstum. Fólk sé beðið um að takmarka náin samskipti við aðra farþega og fólk beri grímu til öryggis og noti handspritt.
Farþeginn sagði fólk taka ástandinu alvarlega en það væri ekki ringulreið um borð. Dagarnir væru nokkuð eðlilegir, andrúmsloftið fínt og þau biðu þess að farsæl lausn fyndist.
Hér er smá samantekt yfir helstu vendingar dagsins.
- Þrír farþegar voru fluttir frá borði, tveir mjög veikir en sá þriðji einkennalaus
- Hondius stefnir til Tenerife, þrátt fyrir efasemdir yfirvalda á Kanaríeyjum
- Stjórnvöld á Spáni héldu blaðamannafund um áformin
- Heilbrigðisráðherra Spánar sagði að spænskir ríkisborgarar verði settir í sóttkví
- Aðrir verða sendir til síns heima
- Innanríkisráðherra Spánar sagði þeim bera skylda til að koma fólkinu til hjálpar
- Forseti Kanaríeyja segir nær að fólkið fái að fara í höfn á Grænhöfðaeyjum
Tedros Ghebreyesus, forstjóri Alþjóðaheilbrigðisstofnunarinnar WHO, telur ekki líkindi með atburðarásinni nú og þegar heimsfaraldur kórónuveiru hófst fyrir nokkrum árum.
AFP greinir frá þessu.
Tveir af þeim þremur sem fluttir voru frá Hondius fyrir skömmu eru með alvarleg einkenni. Þetta kemur fram í tilkynningu frá rekstraraðila skipsins, Oceanwide. Hanta-smit hafi ekki verið staðfest hjá þeim að svo stöddu.
Sá þriðji hafi verið náinn manneskju sem lést um borð 2. maí.
Tveir smitsjúkdómalæknar eru væntanlegir um borð í dag. Að sögn Oceanwide koma þeir frá Hollandi.
Fernando Grande-Marlaska, innanríkisráðherra Spánar, varði ákvörðun sína um að leyfa Hondius að sigla til Kanaríeyja þrátt fyrir efasemdir heimamanna. Hann sagði að um borð væru um 140 manns sem þyrftu nauðsynlega á hjálp að halda.
Grande-Marlaska sagði að Alþjóðaheilbrigðismálastofnunin hefði óskað eftir því við Spánverja að höfn á Kanaríeyjum yrði notuð.
Monica Garcia, heilbrigðisráðherra Spánar, sagði á blaðamannafundi í hádeginu að spænskir ríkisborgarar sem eru í skemmtiferðaskipinu Hondius verði settir í sóttkví eftir að þeir stíga frá borði. Heilbrigðisstarfsmenn skoða fólkið við komuna til Kanarí og síðan verður það sent herspítala í Madríd, höfuðborg Spánar.
Ferðamenn frá öðrum verða sendir til síns heima ef þeir reynast einkennalausir við heilbrigðisskoðun. Þeir verða svo að fylgja sóttvarnareglum í heimalöndum sínum.
Rekstraraðili Hondius hefur beðið um leyfi til þess að leggjast að bryggju í Santa Cruz á Tenerife á laugardaginn. Fernando Clavijo, forseti Kanaríeyja, segir ekki skynsamlegt að allir farþegar komi þangað.
„Ef það er öruggt og farþegar heilbrigðir gætu þeir alveg farið frá alþjóðaflugvellinum á Grænhöfðaeyjum,“ segir Clavijo. Hann virðist því enn ekki vilja fá skipið til Kanaríeyja.
Monica Garcia, heilbrigðisráðherra Spánar, var rétt í þessu að kynna áætlanir ríkisstjórnarinnar um komu skipsins til Kanaríeyja.
Í tilkynningu á heimasíðu Oceanwide Expeditions, sem rekur skemmtiferðaskipið Hondius, segir að áætlað sé að sigla til Kanaríeyja. Fyrirtækið segist í nánum samskiptum við yfirvöld þar varðandi nákvæman komutíma, sóttkví og skimun.
„Við getum ekki staðfest neitt varðandi áframhaldandi ferðalög farþega á þessu stigi. Það veltur á ráðleggingum lækna og niðurstöðum skimana,“ segir í tilkynningunni.
Stjórnvöld á Spáni höfðu heimilað Hondius að leggjast að bryggju á Kanaríeyjum en yfirvöld þar samþykkja það ekki.
Þrír smitaðir hafa verið fluttir frá borði og fara til Hollands á sjúkrahús. Búið er að staðfesta þjóðerni þeirra, einn er frá Bretlandi, annar frá Hollandi og sá þriðji er frá Þýskalandi.
Tedros Ghebreyesus, forstjóri Alþjóðaheilbrigðisstofnunarinnar, segir að WHO haldi áfram að vinna náið með rekstraraðila skipsins og stjórvöldum Grænhöfðaeyja, Bretlands, Spánar og Hollands.
„Á þessu stigi er hættan lítil á heildina litið,“ skrifar Ghebreyesusí færslu á X.
Maður sem var um borð í Hondus en var kominn heim til sín í Sviss er smitaður af hantaveiru. Samkvæmt svissneska heilbrigðisráðuneytinu hafði maðurinn samband við heimilislækni í lok apríl áður en hann fór á sjúkrahús.
Þar var hann settur í einangrun og síðar var staðfest að hann hefði smitast af hantaveiru.
Tveir læknar sem sérhæfa sig í smitsjúkdómum eru á leiðinni frá Hollandi. Þeir ætla um borð í skipið og vera þar áfram eftir áætlaða brottför frá Grænhöfðaeyjum.
Þetta segir rekstraraðili skipsins.
Guðrún Aspelund, sóttvarnalæknir, sagði í fréttum okkar í gær að Hondius yrði ekki hleypt að landi hér nema að uppfylltum ströngum skilyrðum. Íslensk stjórnvöld hafi valdheimildir til að stöðva komu skipsins til Íslands.
„Það er ekki á forræði sóttvarnalæknis en við höfum alveg valdheimildir til slíks. Bæði varðandi siglingar og að koma í höfn. Þannig að það á ekkert skip að þurfa að koma og leggja hér að sem að við teljum ekki vera öruggt,“ sagði Guðrún.
Alþjóðaheilbrigðisstofnunin staðfestir að verið sé að flytja þrjá farþega frá borði. „Líðan þeirra er stöðug og einn er einkennalaus,“ segir Ann Lindstrand hjá WHO á Grænhöfðaeyjum við AFP.
Gert er ráð fyrir að skipið fari af stað frá Grænhöfðaeyjum eftir rýminguna. Þá á, eða átti að minnsta kosti, að stefna til Kanaríeyja. Sú sigling tæki um þrjá sólarhringa.
Stjórnvöld á Kanaríeyjum hafa hafnað því að leyfa Hondius að leggjast að bryggju.
Stjórnvöld á Kanaríeyjum hafna því að leyfa hollenska skipinu Hondius að leggjast að bryggju. Fernando Clavijio, forseti Kanaríeyja, segir þau ekki hafa nægar upplýsingar um ástandið um borð.
Hollenska skipið Hondius fær ekki að leggjast að bryggju á Kanaríeyjum líkt og spænsk stjórnvöld höfðu heimilað. Stjórnvöld á Kanaríeyjum hafna því og forsetinn segir þau ekki hafa nægar upplýsingar.
Í gær staðfesti spænska heilbrigðisráðuneytið að Spánn ætlaði að taka á móti skemmtiferðaskipinu Hondius á Kanaríeyjum í samræmi við alþjóðalög og af mannúðarástæðum. Það virðist ekki ætla að ganga eftir því stjórnvöld á Kanaríeyjum hafna þessu. „Ég get ekki leyft bátnum að koma til Kanaríeyja,“ segir Fernando Clavijo, forseti Kanaríeyja, í viðtali við útvarpsstöðina Onda Cero.
„Við höfum ekki fengið nægar upplýsingar,“ bætir Clavijo við.
Rannsóknir á hanta-veirunni sem herjar á farþega og áhöfn skemmtiferðaskipsins Hondius hafa leitt í ljós að smitið hefur borist milli manna. Þessu greindi Aaron Motsoaledi, heilbrigðisráðherra Suður-Afríku, frá í dag.
Hann sagði suðurafrískri þingnefnd að bráðabirgðarannsóknir sýndu að hanta-veiran sem greindist væri af Andes-afbrigði. „Og það vill svo til að það er eina afbrigðið af 38 sem þekkt er að valdi smiti frá einni manneskju til annarrar.“
Hantaveiran hefur mörg afbrigði sem valda sýkingum. Hún kemur frá nagdýrum, rottum, músum og leðurblökum og er frekar sjaldgæf. Einkennin eru mismunandi eftir heimshlutum, en geta verið væg, alvarleg og lífshættuleg.
Magnús Gottfreðsson, prófessor í smitsjúkdómalækningum við læknadeild Háskóla Íslands, segir að það séu yfir 40 tegundir eða afbrigði af hanta-veiru. Þær finnast í Asíu, Evrópu og Norður- og Suður-Ameríku. Veiran getur valdið allt frá einkennalausum sýkingum og yfir í alvarlegar sýkingar. Þær geta haft í för með sér öndunarbilun og áhrif á blóðrás og nýru.
„Í þeim tilvikum þá getur dánartíðnin verið mjög há, allt að áttatíu prósent,“ bendir Magnús á. Þegar veikindi eru komin á það stig er aðeins hægt að veita stuðningsmeðferð því ekkert bóluefni eða veirulyf er til.
