Tekist var á um vindorkuver í Silfrinu í kvöld og sagði Halla Hrund Logadóttir, þingmaður Framsóknarflokksins, frumvarp Jóhanns Páls Jóhannssonar umhverfis- og loftslagsráðherra um vindorku vera tifandi tímasprengju.
„Það er einfaldlega þannig að við erum með 43 vindorkuverkefni, við sjáum breytt eignarhald birtast í þeim eftir að við byrjum að innleiða orkupakkana, þetta eru eiginlega allt verkefni í erlendri eigu og mér finnst sú staða ekki hafa fengið nægilega umfjöllun í íslensku samfélagi,“ sagði hún.
Halla segir vindorkuver gríðarlega stór mannvirki sem vissulega geti skapað verðmæti en eigi engu að síður ekki heima alls staðar í íslenskri náttúru.
Finnur Beck, framkvæmdastjóri Samorku, brást við ummælum Höllu síðar í þættinum og sagði að þrátt fyrir að svo mörg vindorkuver væru komin inn í rammaáætlun væri alls ekki þar með sagt að þau yrðu að veruleika.
Jóhann Páll segir að rammaáætlun sé í raun mikilvægt verkfæri til þess að tryggja að ekki sé farið í verkefni þar sem unnin væru óafturkræf spjöll á náttúru landsins.
„Þess vegna erum við líka með frumvarp fyrir Alþingi sem snýst um að fella vindinn kyrfilega undir rammaáætlun og um leið hámarka áhrifavald sveitarfélaga og nærsamfélaga þegar kemur að vindinum,“ sagði Jóhann sem tók fram að bannað yrði að virkja vind á viðkvæmum náttúrusvæðum.
Hins vegar hitnaði umræðan þegar birt var kort sem Halla Hrund sagði sýna fram á þau svæði sem til stæði að virkja. Á kortinu er að sögn Höllu Hrundar allt það svæði sem merkt er með gráum lit mögulegt virkjunarsvæði fyrir vindorku fyrir utan lituðu svæðin og miðhálendið sem merkt er með rauðri línu. Kortið kemur frá kynningu umhverfis- og loftslagsráðuneytisins.
„Þarna er verið að taka frá eða hlífa ákveðnum svæðum og það er vel,“ sagði Halla.
„En það sem er mikilvægt fyrir okkur að átta okkur á er hvaða svæði eru ekki undanskilin og ímyndið ykkur núna að þið séuð að keyra hringinn í kringum landið og þið séuð að horfa til beggja átta eins og maður gerir þegar maður er í ferðalagi á sumrin,“ sagði Halla sem spurði hvort ekki væri hagkvæmara að velja örfáa staði fyrir vindorku.
Þessu var Jóhann Páll þá ekki sammála og taldi Höllu fara frjálslega með málið. „Í fyrsta lagi er alveg ævintýralegur hræðsluáróður að láta eins og það séu að fara að rísa einhver 43 vindorkuver á Íslandi,“ sagði Jóhann. „Það er enginn pólitískur stuðningur við slíkt,“ sagði hann. Halla Hrund benti þó á að tekist væri á um málið í Borgarbyggð og að vindorka væri lykilkosningamál í sveitarfélaginu.
