Benedikt Gíslason, bankastjóri Arion banka, segir niðurstöður fasteignamats Húsnæðis- og mannvirkjastofnunar (HMS) gera almenningi auðveldara fyrir að komast inn á húsnæðismarkaðinn.
HMS kynnti í gær fasteignamat fyrir árið 2027. Á kynningarfundinum flutti Benedikt stutt erindi um mikilvægi fasteignamats fyrir fjármálastofnanir.
Sagði hann fasteignamat vera mjög mikilvægt tæki fyrir fjármálastofnanir hér á landi þar sem það væri, ásamt kaupverði íbúða, eitt af tveimur grunnviðmiðum sem notast er við til að ákvarða hámarkslánsfjárhæð.
Mikilvægi þess væri svo enn meira þegar unnið er að endurfjármögnun íbúðalána þar sem fasteignamat væri grunnviðmið til að ákvarða hámarkslánsfjárhæð.
Raunvirði lækkað um 3,8%
Í skýrslu HMS kemur fram að fasteignamat íbúða hækkar um 1,2% sem er töluvert minna en á sama tíma í fyrra þegar meðalfasteignamatið hækkaði um 10,2%.
Hækkun fasteignamats íbúða um 1,2% þýðir að fasteignaverðið hefur ekki haldið í við verðbólgu, raunar hefur raunvirði íbúða lækkað um 3,8% á milli ára.
Lítil hækkun geri markaðinn aðgengilegri
Í samtali við mbl.is eftir fundinn ræddi Benedikt um þýðingu niðurstöðu HMS fyrir fjölskyldur og einstaklinga.
Sagði hann þessa litlu hækkun fasteignamats á íbúðarhúsnæði hafa mikla þýðingu fyrir fjölskyldur og einstaklinga sem væru að íhuga að kaupa fasteignir. Minni hækkun á fasteignamati gæti skilað sér í minni áhrifum á verðlagningu.
„Töluvert minni hækkun fasteignamats en síðustu ár staðfestir að markaðurinn er rólegri sem gefur fólki meiri tíma til að taka sínar ákvarðanir,“ sagði Benedikt og ítrekaði mikilvægi þess að fólk hefði einmitt tíma til að taka ákvörðun um svo mikilvæga fjárfestingu.
Að hans mati geri þetta almenningi auðveldara fyrir að komast inn á markaðinn.
Minnkandi þrýstingur á íbúðaverð
Í skýrslu HMS kom einnig fram að ein ástæða fyrir lítilli hækkun íbúðaverðs væri minnkandi þrýstingur.
Benedikt sagði þennan minnkandi þrýsting vera til marks um að í bland við töluvert mikla framleiðslu á nýjum eignum væri gríðarlega hátt vaxtastig að minnka spennuna á markaðnum.
Hann bætti við að íslenski fasteignamarkaðurinn væri orðinn „algjör kaupendamarkaður“ en hann hefði lengi vel verið seljendamarkaður.
