Leikkonan Hayden Panettiere, sem lést á sunnudag aðeins 36 ára gömul, hafði aðeins nokkrum mánuðum fyrir andlátið stigið fram með ítarlegar frásagnir af því hvernig var að alast upp sem barnastjarna í Hollywood og aðstæðum þar sem hún sagðist hafa verið mótuð til hlýðni frá unga aldri.
Panettiere lést 16. ágúst. Fjölskylda hennar staðfesti andlátið í gegnum talsmann hennar en dánarorsök hefur ekki verið gerð opinber. Málið er til rannsóknar.
Lögreglan í Greenville í Suður Karólínu hefur jafnframt sagt að bráðabirgðarannsókn hafi ekki leitt neitt í ljós sem bendir til þess að um saknæmt athæfi hafi verið að ræða.
„Að segja nei hefði í raun aldrei verið valkostur“
Panettiere gaf út bókina This Is Me: A Reckoning þann 19. maí síðastliðinn og ræddi á sama tíma opinberlega um ýmsar dökkar hliðar þess að hafa alist upp innan bandaríska skemmtanaiðnaðarins.
„I was groomed“
Panettiere hóf feril sinn þegar hún var barn og lýsti því í viðtali við The Hollywood Reporter að hún hefði orðið fyrir grooming, eða skipulagðri tælingu, í leiklistarbransanum. Hún sagði að henni hefði frá unga aldri verið kennt að þóknast öðrum og fylgja fyrirmælum fullorðinna.
Að segja nei hefði í raun aldrei verið valkostur þegar kæmi að vinnunni, að hennar sögn. Hún sagði þessa stöðugu þörf fyrir að þóknast öðrum og skort á stjórn yfir eigin lífi síðar hafa haft mikil áhrif á hana og tengdi það meðal annars við fíknivanda sinn.
Vinkona gabbaði hana upp í rúm með frægum manni
Panettiere sagði frá því að hafa verið stödd á svokallaðri súper snekkju við Suður Frakkland þegar hún var 18 ára. Með henni var kona sem hún lýsti sem einni af sínum nánustu trúnaðarvinkonum.
Undir lok ferðarinnar hafi konan beðið hana að koma með sér niður í einkaklefa á skipinu. Þar beið „frægur breskur söngvari og lagahöfundur á þrítugsaldri“, ber að ofan í rúmi undir sæng. Panettiere nafngreindi manninn ekki.
Að sögn Panettiere hvíslaði vinkonan síðan að henni að hún vildi að hún færi upp í rúmið til mannsins og yfirgaf herbergið. Panettiere sagðist fyrst hafa hlýtt í losti en áttaði sig síðan á stöðunni, sagði manninum að ekkert myndi gerast og yfirgaf herbergið.
Hún sagði reynsluna hafa verið sérstaklega mikið áfall vegna þess að hún hafði treyst konunni fullkomlega. Hún lýsti því síðar að áralöng reynsla af því að vera „stjórnað“ af fullorðnu fólki í skemmtanabransanum hefði kennt henni að treysta fólkinu í kringum sig og bæla niður eigin eðlishvöt.
Þegar Panettiere rifjaði atvikið upp sagði hún að þótt hún hefði talið sig mjög þroskaða þegar hún var 18 ára hefði hún í raun ekki haft þroska til að gera sér fulla grein fyrir hættunum í kringum sig. Hún sagði einnig að þegar hún áttaði sig á því hvað væri að gerast hefði hún fundið að fólkinu í kringum hana fyndist þetta ekkert óvenjulegt.
13 ára í kossaatriði með fullorðnum manni
Panettiere rifjaði einnig upp tökur á kvikmyndinni Raising Helen frá árinu 2004.
Hún var aðeins 13 ára þegar hún tók þar upp fyrsta ástar- og kossaatriði lífs síns með leikara sem hún lýsti sem manni á þrítugsaldri eða rúmlega tvítugum. Entertainment Weekly segir að maðurinn hafi verið að minnsta kosti sjö árum eldri en hún.
Panettiere sagði móður sína hafa staðið hjá á meðan atriðið var tekið upp og lýsti því hvernig fullorðni leikarinn notaði tunguna við kossinn án þess að hún hefði átt von á því.
Hún sagðist hafa orðið mjög hissa en ekki viljað gera mikið mál úr því. Hún hefði einfaldlega hugsað með sér að svona væri þetta þá gert.
Frásögnin vakti sérstaka athygli í ljósi þess hvernig Panettiere lýsti sjálf uppvexti sínum í bransanum, að hún hefði verið alin upp við að hlýða og að „nei“ hefði ekki verið raunverulegur valkostur.
Sagði Óskarsverðlaunahafa hafa berað sig
Í bókinni greindi Panettiere jafnframt frá öðru atviki þegar hún var 19 ára.
Hún sagðist hafa verið í samkvæmi þegar maður sem hún sagði vera Óskarsverðlaunahafa sem var í miklum metum í Hollywood afhjúpaði kynfæri sín fyrir henni þegar hún var að yfirgefa svæðið. Hún nafngreindi manninn ekki.
Á síðustu mánuðum ævi sinnar hafði Panettiere byrjað að tala mun opinskár um reynslu sína sem barnastjarna, það sem hún sjálf kallaði „grooming“
Panettiere sagði atvikið hafa komið henni algjörlega í opna skjöldu. Fram að þessu hefði hún almennt upplifað karlmenn í Hollywood sem kurteisa, þótt hún hefði orðið fyrir óviðeigandi athugasemdum og hegðun áður.
Óttaðist lögsóknir og að þurfa að mæta fólkinu aftur
Panettiere var í kjölfar útgáfu bókarinnar spurð hvers vegna hún hefði ákveðið að nafngreina ekki þá frægu einstaklinga sem komu fyrir í þessum frásögnum.
Hún sagði eina ástæðuna vera að bransinn hefði lítið breyst. Einnig sagði hún að um væri að ræða fólk sem hún gæti þurft að hitta aftur.
Hún sagði jafnframt við The Hollywood Reporter að ákvörðunin hefði verið tekin til að vernda sjálfa sig og fyrirtæki sitt fyrir mögulegum lögsóknum frá mjög reiðu frægu fólki.
Í Tamron Hall Show sagði hún jafnframt að hún hefði viljað segja sína eigin sögu án þess að draga aðra í svaðið opinberlega, þótt hluti hennar vildi vissulega afhjúpa „þetta hyski“. Hún bætti síðan við að þetta væri þrátt fyrir allt iðnaður sem hún þyrfti að geta starfað í.
Frásagnirnar birtust aðeins þremur mánuðum fyrir andlátið
Tímasetningin á dauða hennar vekur því óhjákvæmilega athygli. Panettiere gaf út bókina 19. maí og fór í kjölfarið í fjölmiðlaviðtöl þar sem hún ræddi þessar frásagnir opinberlega. Hún lést 16. ágúst, tæpum þremur mánuðum síðar.
Það er hins vegar rétt að taka fram að opinberlega er ennþá ekkert sem tengir dauða Panettiere við þessar frásagnir eða ásakanir hennar. Dánarorsök hefur ekki verið tilkynnt og lögregla segir bráðabirgðarannsóknina ekki hafa sýnt merki um saknæmt athæfi eða grunsamlegar kringumstæður.
Það breytir þó ekki þeirri staðreynd að á síðustu mánuðum ævi sinnar hafði Panettiere byrjað að tala mun opinskár um reynslu sína sem barnastjarna, það sem hún sjálf kallaði „grooming“, skort sinn á raunverulegu valdi til að segja nei og kynferðisleg atvik sem hún sagðist hafa lent í á unglingsárum sínum og sem ung kona í Hollywood.
Svipað samhengi vakti athygli eftir dauða Anne Heche
Andlát Panettiere hefur orðið til þess að umræður hafa skotið upp kollinum þar sem því er líkt við aðstæður í kringum dauða leikkonunnar Anne Heche árið 2022. Heche hafði skömmu áður lokið tökum á Lifetime myndinni Girl in Room 13, sem fjallaði um mansal og kynferðislega misnotkun.
Verkefnið tengdist málefni sem Heche hafði sjálf verið að rannsaka og tala um opinberlega. Eftir dauða hennar sagði leikstjórinn Elisabeth Röhm að Heche hefði verið sérstaklega áhugasöm um að vekja athygli á ofbeldi gegn konum í Hollywood og mansali tengdu því, meðal annars í ljósi þess að hún hafði sjálf nýlega greint opinberlega frá kynferðislegu ofbeldi sem hún sagðist hafa orðið fyrir.
Eftir dauða Heche fóru jafnframt á kreik fullyrðingar um að hún hefði verið að vinna að rannsókn eða heimildarmynd um barnaníð í Hollywood og/eða Jeffrey Epstein. Engar traustar heimildir hafa þó staðfest þær fullyrðingar. Girl in Room 13 var leikin kvikmynd um mansal en ekki rannsókn á Epstein eða meintum barnaníðshring í Hollywood.
Samhengið er því að nokkru leyti sambærilegt við síðustu mánuði í lífi Panettiere. Báðar höfðu þær skömmu fyrir andlát sitt tekið þátt í opinberri umræðu um kynferðislegt ofbeldi í Hollywood, misnotkun og varnarleysi ungra kvenna.
Fleiri sambærileg tilfelli
Panettiere og Heche eru ekki einu manneskjurnar úr skemmtanaiðnaðinum sem hafa látist skömmu eftir að hafa rætt opinberlega um kynferðislegt ofbeldi eða misnotkun.
August Ames, 23 ára leikkona í fullorðinsmyndaiðnaðinum, opnaði sig árið 2017 um kynferðislegt ofbeldi sem hún sagðist hafa orðið fyrir í bransanum. Hún lést innan við þremur mánuðum síðar og var dauði hennar úrskurðaður sjálfsvíg.
Anthony Bourdain varð áberandi stuðningsmaður #MeToo hreyfingarinnar eftir ásakanir Asia Argento á hendur Harvey Weinstein og talaði opinskátt um kynferðisofbeldi í bransanum og valdakerfi sem vernduðu gerendur. Hann lést um átta mánuðum síðar og var dauði hans úrskurðaður sjálfsvíg.
Isaac Kappy fór árið 2018 að saka þekkta einstaklinga í Hollywood opinberlega um barnaníð og tala um meintan barnaníðshring. Hann lést um níu mánuðum síðar.
Tekið skal fram að ekki hefur tekist að sanna tengsl dauða þessara aðila og þess að þau opnuðu sig um skipulagt kynferðisofbeldi og mansal í Hollywood.
