Meirihluti Sjálfstæðisflokks og Miðflokks í Reykjanesbæ segir að viðsnúningur hafi orðið í rekstri bæjarins á fyrstu þremur mánuðum nýs meirihluta. Þetta kemur fram í tilkynningu frá flokkunum. Bæjarsjóður stefnir nú í að skila afgangi á árinu 2026, þótt hann hafi verið rekinn með halla á fyrri helmingi ársins, að sögn meirihlutans.
Níu mánaða uppgjör bæjarsjóðs var kynnt í bæjarráði í morgun, samkvæmt tilkynningunni. Fundargerð fundarins og uppgjörið sjálft höfðu ekki verið birt á vef Reykjanesbæjar þegar fréttin var skrifuð. Samkvæmt meirihlutanum minnkaði hallinn úr tæpum 103 milljónum króna eftir sex mánuði í tæpar 10 milljónir króna. Rekstrarleg framlegð hækkaði á sama tíma úr 8,4 prósentum í 9,4 prósent.
Hallinn á fyrri helmingi ársins var 103 milljónir króna þrátt fyrir 366 milljóna króna einskiptistekjur frá HS Veitum, samkvæmt tilkynningunni. Án þeirra hefði hallinn numið 469 milljónum króna. Sömu tölur koma fram í bókun meirihlutans á fundi bæjarstjórnar 6. október, þar sem einnig kom fram að fjárhagsáætlun hefði gert ráð fyrir rúmlega 93 milljóna króna afgangi á fyrri helmingi ársins. Sex mánaða uppgjörið var lagt fram í bæjarráði 17. september.
„Þetta eru afar ánægjuleg tíðindi og sýna að við erum á réttri leið,“ segir Vilhjálmur Árnason bæjarstjóri í tilkynningunni. Hann segir að strax á fyrstu vikum nýs meirihluta hafi verið ráðist í breytingar og hagræðingaraðgerðir og að skýr skilaboð hafi verið send inn í stjórnsýsluna um aukið aðhald og ábyrga meðferð fjármuna bæjarbúa.
Frá því að meirihlutinn tók við stjórn sveitarfélagsins í júní hefur nefndum og ráðum verið fækkað og stjórnskipulaginu breytt, að sögn meirihlutans. Laun bæjarstjóra voru lækkuð, ekki var endurráðið í nokkur stöðugildi sem losnuðu og sérstakt umbóta- og hagræðingarteymi var sett á laggirnar.
„Ábyrgur rekstur er forsenda þess að við getum lækkað álögur á bæjarbúa og styrkt þá þjónustu sem skiptir fjölskyldurnar okkar mestu máli,“ segir Gunnlaugur Kárason, formaður bæjarráðs, í tilkynningunni.
Fjárhagsáætlun fyrir árið 2027 fer í fyrri umræðu í bæjarstjórn 1. desember. „Við ætlum að fara betur með peninga bæjarbúa og setja fjölskyldurnar í Reykjanesbæ í fyrsta sæti,“ segir Gunnlaugur að lokum.