Ísfélagið í Vestmannaeyjum hagnaðist um 2,8 milljarða króna á fyrsta ársfjórðungi 2026. Á sama tíma í fyrra tapaði félagið um 400 milljónum króna. Árshlutareikningur félagsins var samþykktur á stjórnarfundi í dag.
Rekstrartekjur félagsins voru 9.080 milljónir króna, rekstrarhagnaður 3.336 milljónir króna, hagnaður eftir skatta 2.832 milljónir króna og EBITDA-framlegð var 3.925 milljónir króna.
„Sé efnahagur félagsins í lok fyrsta ársfjórðungs 2026, færður í íslenskar krónur á lokagengi tímabilsins (124,89), eru heildareignir 110,0 milljarðar króna, fastafjármunir 88,1 milljarður króna og veltufjármunir 21,9 milljarðar króna. Eigið fé í lok fyrsta ársfjórðungs 2026 var 73,4 milljarðar króna og skuldir og skuldbindingar 36,6 milljarðar króna,“ segir í uppgjörinu.
Haft er eftir Stefáni Friðrikssyni forstjóra að ástæður góðrar afkomu á fyrsta fjórðungi þessa árs séu góð loðnuvertíð og ágæt aflabrögð Sólbergs ÓF, frystitogara félagsins, ásamt háu verði á helstu afurðum félagsins.
„Loðnuvertíðin gekk vel en það er ekki tilviljun þegar kemur að rekstri Ísfélagsins. Fjárfestingar undanfarna ára, bæði í skipum og landvinnslum félagsins gera það að verkum að hægt er að hámarka verðmætin á stuttum vertíðum. Það er afar ánægjulegt hversu vel til tókst að skapa þessi verðmæti sem verða til vegna góðra og samhentra áhafna, góðs sölustarfs og síðast en ekki síst öflugs starfsfólks í landi.
Hásetahluturinn allt að 8,9 milljónir króna
Fyrsta loðnulöndunin var þann 7. febrúar og síðasta löndun þann 19. mars og stóð vertíðin því yfir í 41 dag. Eftir leiðréttingar í samræmi við kjarasamninga til hækkunar á aflaverðmæti skipanna var t.d. hásetahluturinn án orlofs á Sigurði VE og Heimaey VE á loðnuvertíðinni á bilinu 8,7-8,9 milljónir króna en skipin voru hvort um sig á sjó í u.þ.b. 350 klukkustundir eða sem nemur tæplega 15 dögum á sjó,“ segir Stefán.
