Enn er ekki vitað hversu margir minkar hafa sloppið út fyrir öryggisgirðingar á Dalsbúi í Mosfellsdal. Talið er að mörg þúsund minkar hafi sloppið úr búinu, margir þeirra eru lausir innan girðingarinnar.
Næstu skref eru að fanga sem flesta minka sem hafa sloppið og aflífa þá með mannúðlegum hætti segir Þóra Jónasdóttir yfirdýralæknir Matvælastofnunar. Talið er að fjöldi minka hafi ekki fundist og því þarf að vakta svæðið.
Þóra segir að aflífa þurfi minkana sem sluppu út fyrir öryggisgirðingar.
„Vegna þess að þeir geta ekki komið aftur í búið bæði af smitvarnarlegum ástæðum og það er hreinlega búið að rútta öllu fyrirkomulagi í búrunum. Þannig að þessi dýr geta ekki verið endilega fleiri saman í einu búri sem ekki eru vön að vera saman,“ segir hún.
Í lögum um velferð dýra segir að eigandi beri ábyrgð á því að handsama dýr sem hefur sloppið. Í ljósi umfangs þessa atviks steig sveitarfélagið inn og ræsti út neyðarstjórn Mosfellsbæjar.
„Þar koma að lögregla og fólk sveitarfélagsins, almannavarnir og eins ráðgjafar eins og Matvælastofnun. Þannig að það sé hægt að vinna þetta allt í sameiningu. Þar er auðvitað haft að leiðarljósi velferð dýra og einnig að lágmarka þann mögulega skaða sem getur orðið á náttúru og lífríki vegna lausagöngu minka,“ segir Þóra.
