„Ég vil bara undirstrika að Evrópusambandsaðild myndi hafa engin áhrif, engu breyta um þann samning sem er í gildi milli Bandaríkjanna og Íslands, varnarsamninginn frá 1951,“ segir Þorgerður Katrín Gunnarsdóttir utanríkisráðherra.
Þetta var svar hennar við fyrirspurn Stefáns Vagns Stefánssonar, varaformanns Framsóknarflokksins, á Alþingi í morgun. Stefán Vagn vísaði í grein eftir Gunnar Pálsson, fyrrverandi sendiherra, sem birtist í Morgunblaðinu í morgun þar sem hann veltir því upp hvaða áhrif möguleg aðild að Evrópusambandinu hefði á varnarsamninginn.
Gunnar rekur að með aðild yrði Ísland hluti af sameiginlegum varnaráætlunum sambandsins og alls óvíst að Bandaríkin telji það í verkahring sínum að annast varnir eins af aðildarríkjum sambandsins. Hann telur í það minnsta að stjórnvöld þurfi að fá úr því skorið áður en gengið verður til atkvæðagreiðslu.
„Veldur vonbrigðum að svo virðist ekki hafa verið gert, en að kylfa ráði kasti og að dregin sé upp leiðandi og ónákvæm mynd af stöðu landsins í vestrænu varnasamstarfi.“
Ísland hluti af heimavarnarsvæði Bandaríkjanna
Þorgerður Katrín sagði að sér þætti það skrítið ef Íslendingar þyrftu að biðja aðrar þjóðir um heimild til að gera það í utanríkismálum og gaf lítið fyrir áhyggjur sendiherrans.
„Bandaríkin bera ábyrgð samkvæmt varnarsamningnum á að sinna öryggi og vörnum okkar Íslendinga og hafa það líka meðal annars í gegnum NATO. Þetta hefur ekki nein áhrif á það og ég vil undirstrika að öryggishagsmunir Íslands og öryggishagsmunir Bandaríkjanna eru samofnir á Norður-Atlantshafi. Við vitum að Ísland er meðal annars skilgreint sem hluti af heimavarnarsvæði Bandaríkjanna.“
