„Ég vil bara undirstrika það að Evrópusambandsaðild myndi hafa engin áhrif, engu breyta um þann samning sem er í gildi milli Bandaríkjanna og Íslands, varnarsamninginn frá 1951,“ segir Þorgerður Katrín Gunnarsdóttir utanríkisráðherra.
Var þetta svar hennar við fyrirspurn Stefáns Vagns Stefánssonar, varaformanns Framsóknarflokksins, á Alþingi í morgun. Vísaði Stefán Vagn í grein sem Gunnar Pálsson, fyrrum sendiherra, skrifaði í Morgunblaðið í morgun þar sem hann velti upp hvaða áhrif möguleg ESB-aðild hefði á varnarsamninginn.
Gunnar rekur að með aðild yrði Ísland hluti af sameiginlegum varnaráætlunum sambandsins og því sé alls óvíst hvort Bandaríkin telji það í sínum verkahring að annast varnir eins af aðildarríkjum sambandsins. Telur hann í það minnsta að stjórnvöld hefðu þurft að fá úr því skorið áður en gengið yrði til atkvæðagreiðslu.
„Veldur vonbrigðum að svo virðist ekki hafa verið gert, en að kylfa ráði kasti og að dregin sé upp leiðandi og ónákvæm mynd af stöðu landsins í vestrænu varnasamstarfi.“
Ísland hluti af heimavarnarsvæði Bandaríkjanna
Þorgerður Katrín sagði að sér þætti það skrítið ef Íslendingar þyrftu að biðja aðrar þjóðir um heimild til að gera það í utanríkismálum og gaf lítið fyrir áhyggjur sendiherrans.
„Bandaríkin bera ábyrgð samkvæmt varnarsamningnum á að sinna öryggi og vörnum okkar Íslendinga og hafa það líka meðal annars í gegnum NATO. Þetta hefur ekki nein áhrif á það og ég vil undirstrika að öryggishagsmunir Íslands og öryggishagsmunir Bandaríkjanna eru samofnir á Norður-Atlantshafi. Við vitum að Ísland er meðal annars skilgreint sem hluti af heimavarnarsvæði Bandaríkjanna.“
