Daði Már Kristófersson, fjármála- og efnahagsráðherra, boðar fimm milljarða króna afgang á fjármálafrumvarpi næsta árs.
„Við hljótum að vera sammála um að við munum aldrei ná sjálfbærum rekstri ríkisins ef við förum ekki yfir núllið einhvern tímann. Það erum við að gera núna og það er mjög mikilvægt,“ sagði Daði Már í viðtali við fréttastofu eftir að hann kynnti fjárlögin.
Í meðferðum þingsins á fjárlagafrumvarpi er algengt að útgjaldaliður ríkisins hækki. Daði segist vonast til þess að þingið skilji mikilvægi þess að skila hallalausum fjárlögum.
„Þetta er það tæki sem ríkið hefur yfir að ráða til að draga úr verðbólgu. Ríkið getur minnkað eigin umsvif og það er besta leiðin. Þó það sé freistandi að setja meiri peninga út, sem það er alltaf, og ef við skoðum Íslandssöguna hefur verið gert ítrekað oft, er núna ákallið um að við stöndum saman um að ná niður verðbólgunni. Þetta verður að klárast.“
Gjaldtaka nái aðeins til erlendra ferðamanna
Meðal tekjuaðgerða sem Daði boðar eru 5 milljarða króna tekjur vegna gjaldtöku í ferðaþjónustu.
„Þetta er svokallað innviðagjald,“ segir Daði.
„Þetta var boðað í ríkisstjórnarsáttmálanum. Þetta hefur lengi verið í umræðunni og er einhvers konar afgjald fyrir þá þær náttúruauðlindir eða náttúruperlur sem ríkið á og eru eru heimsóttar af ferðamönnum.“
Þannig það á að taka upp gjaldtöku á ferðamannastöðum?
„Það á að taka upp gjaldtöku á ferðamannastöðum,“ segir Daði.
Á það jafnt við um Íslendinga og erlenda ferðamenn?
„Nei, hugmyndin er sú að þetta nái einungis til erlendra gesta. Íslendingar eiga jú þessar auðlindir þó ríkið fari með forsvarið, og hafa þegar greitt sitt gjald fyrir reksturinn á þeim.“
Kílómetragjald hækkar
Fjármálaráðherra boðar einnig 4 milljarða króna tekjuaukningu vegna kílómetragjalds.
„Þau eru eitthvað að hækka. Þetta er í samræmi við langtímastefnu sem þessi ríkisstjórn tók yfir og hefur haldið sig við um að styrkja fjárhagslegar stoðir undir fjárfestingar í samgöngum. Við höfum stigið mjög stórt skref í að auka þær fjárfestingar en þær þarf auðvitað að fjármagna,“ segir Daði.
Bankaskattur bitni að einhverju leyti á viðskiptavinum
Daði gerir einnig ráð fyrir 6 milljarða króna tekjuaukningu vegna bankaskatts. Spurður hvort hann óttist að aukin skattheimta á bankana skili sér í verri kjörum til almennings segir Daði:
„Það er alltaf þannig að þegar álögur eru hækkaðar þá dreifist kostnaðurinn að einhverju leyti á þann sem er skattlagður og viðskiptavini hans. Það er hins vegar þannig að þessar ófyrirséðu viðbótartekjur sem bankakerfið hefur fengið vegna verðbólgu, það er borð fyrir báru getum við sagt.“
Hægt er að horfa á viðtalið við Daða í heild í spilaranum ofar í fréttinni.
