Landsréttur hefur stytt töluvert gæsluvarðhald yfir Hannesi Valle Þorsteinssyni sem dæmdur var á dögunum í þriggja ára fangelsi fyrir kynferðisbrot gegn barni á leikskólanum Múlaborg þar sem hann starfaði. Farið var fram á fyrir Héraðsdómi Reykjavíkur að gæsluvarðhaldið yrði framlengt meðal annars á þeim forsendum að ekki lægi fyrir hvort Hannes ætlaði að áfrýja dómnum. Nú liggur hins vegar fyrir að hann ætlar sér ekki að gera það og í kjölfarið var gæsluvarðhaldið stytt um rúmlega hálft ár.
Hannes var sakfelldur fyrir brot gegn stúlkubarni á leikskólanum en sýknaður af ákæru um annað brot gegn sama barni og einnig sýknaður af ákæru um brot gegn öðru barni. Hafði Hannes játað brotið sem hann var sakfelldur fyrir. Hannes var handtekinn í ágúst á síðasta ári, daginn eftir að tilkynnt var um brotið sem hann var svo á endanum sakfelldur fyrir, og hefur setið í gæsluvarðhaldi síðan. Gæsluvarðhaldið dregst frá dómnum en að því loknu verður Hannes væntanlega boðaður í fangelsi til að afplána eftirstöðvar af dómnum, ef einhverjar eru.
Héraðssaksóknari fór í lok síðustu viku, í Héraðsdómi Reykjavíkur, fram á að gæsluvarðhaldið yfir Hannesi yrði framlengt á meðan á áfrýjunarfresti stæði eða á meðan mál hans væri til meðferðar fyrir æðri dómi uns endanlegur dómur gangi, þó ekki lengur en til föstudagsins 4. desesember næstkomandi.
Almannahagsmunir
Var í kröfu héraðssaksóknara einnig vísað til þess að gæsluvarðhaldið yfir Hannesi hafi áður verið framlengt á grundvelli almannahagsmuna.
Að mati Héraðssaksóknara eru brot Hannesar þess eðlis að það sé sérstaklega alvarlegt og óforsvaranlegt að hann gangi laus eins og sakir standa. Gæsluvarðhald sé nauðsynlegt með tilliti til almannahagsmuna með vísan til alvarleika brotsins. Gangi Hannes laus muni það misbjóða réttlætiskennd almennings og vera til þess fallið að valda hneykslun og óróa í samfélaginu að aðili að hann gangi laus áður en máli hans væri lokið með dómi.
Héraðsdómur kvað upp úrskurð sinn á föstudag en í honum kemur fram að dómurinn yfir Hannesi hafi verið kveðinn upp 26. maí síðastliðinn. Samkvæmt því væri áfrýjunarfrestur ekki liðinn og ekki lægi fyrir afstaða Hannesar til áfrýjunar dómsins.
Lögmaður Hannesar mótmælti kröfunni um framlengingu gæsluvarðhaldsins og vísaði til þess að í dómnum hafi Hannes verið sýknaður af hluta ákæruliða og því þyrfti að fara fram nýtt mat á því hvort brotið væri enn talið þess eðlis að ætla mæti að varðhald væri nauðsynlegt með tilliti til almannahagsmuna.
Um það segir í niðurstöðu Héraðsdóms að vegna alvarleika þeirra brota sem Hannes var sakfelldur fyrir og eðlis brotanna, verði að telja verulegar líkur á því að það myndi særa réttarvitund almennings og valda samfélagslegum óróa yrði hann látinn laus á þessu stigi málsins. Þó svo að Hannes hafi verið sýknaður af hluta ákæruliða hafi hann samt sem áður verið sakfelldur fyrir slíkt brot að ætla mætti varðhald nauðsynlegt með tilliti til almannahagsmuna.
Vísar héraðsdómur til þess að Landsréttur hafi ítrekað staðfest að gæsluvarðhald yfir Hannesi væri nauðsynlegt með tilliti til almannahagsmuna. Það breyti engu um það að Hannes hafi verið sýknaður af hluta þeirra brota sem hann var ákærður fyrir enda hafi hann verið sakfelldur fyrir kynferðisbrot gegn barni.
Stytting
Héraðsdómur Reykjavíkur framlengdi því gæsluvarðhaldið yfir Hannesi fram til 4. desember næstkomandi.
Úrskurðinum var áfrýjað til Landsréttar sem kvað upp sinn úrskurð í gær, mánudag. Í honum kemur fram að samkvæmt greinargerð lögmanns Hannesar ætli hann sér að una dómi Héraðsdóms Reykjavíkur og þar með ekki áfrýja.
Landsréttur fellst ekki á kröfu Hannesar um að fella úrskurð héraðsdóms úr gildi en fellst á varakröfuna um að gæsluvarðhaldið verði stytt. Hannes var því úrskurðaður í gæsluvarðhald til 26. júní næstkomandi.
