Þjóðaratkvæðagreiðsla um aðildarviðræður Íslands við Evrópusambandið (ESB) snýst ekki um að upplýsa þjóðina og leyfa henni svo að velja að mati Sigmundar Davíðs Gunnlaugssonar, formanns Miðflokksins.
„Þetta snýst um að Þorgerður Katrín vill fá umboð til þess að fara með óútfylltan tékka á fullveldi Íslands í viðræður við Evrópusambandið,“ segir Sigmundur í samtali við mbl.is.
Þingsályktunartillaga Þorgerðar Katrínar Gunnarsdóttur utanríkisráðherra um þjóðaratkvæðagreiðsluna var samþykkt af Alþingi í dag. Að óbreyttu ganga landsmenn að kjörborðinu þann 29. ágúst.
Umræðunni kippt úr sambandi
„Við munum eiga von á því í sumar, sérstaklega í ágúst, að fá heimsóknir frá embættismönnum og meintum sérfræðingum sem ætla að útskýra fyrir Íslendingum að þetta sé nú allt hið besta mál,“ segir hann.
„Um leið og búið er að taka þessa umræðu að miklu leyti úr sambandi því að þau vita, og þess vegna völdu þau þessa dagsetningu, að þjóðmála- og stjórnmálaumræða er afar takmörkuð á Íslandi á sumrin,“ bætir hann við.
Hann segir fólk nú komast upp með að reka íslensk stjórnmál algjörlega án tengingar við raunveruleikann.
„Ég held að mér sé óhætt að segja að hvergi annars staðar hefði stjórnvöldum dottið í hug að það væri hægt að telja almenningi trú um að það að falast eftir því að fá að ganga inn í Evrópusambandið snúist um eitthvað allt annað en hvort menn vilji ganga í Evrópusambandið,“ segir Sigmundur.
Kristrún gat ekki svarað
Hann furðar sig einnig á því að ríkisstjórnin hafi enn ekki svarað því hvað gerist kjósi Íslendingar já eða nei í ágúst.
„Nú síðast í dag gat Kristrún Frostadóttir forsætisráðherra ekki svarað því hvað myndi gerast ef svarið yrði nei, hvort það hefði einhverjar afleiðingar. Og það sem verra er, hefur ekki tekist að útskýra hvað gerist ef svarið er já.“
Þingið hafnaði í dag breytingartillögu minnihlutans um að samningsmarkmið og skilyrði Íslands í mögulegum samningaviðræðum við ESB yrðu tilgreind fyrir þjóðaratkvæðagreiðsluna.
„Það á að hafa sem minnsta umræðu, sem minnstar upplýsingar og sem minnsta vitneskju um hvað taki við segi fólk já,“ segir hann.
Þingmenn fengu aðgang að trúnaðargögnum
Þingmönnum sem ekki sitja í utanríkismálanefnd Alþingis var í dag veittur aðgangur að trúnaðargögnum sem utanríkismálanefnd hefur fengið send í tengslum við þjóðaratkvæðagreiðsluna og mögulega aðildarviðræður við ESB.
„Okkur tókst að knýja á um að þingmenn fengju að skoða þau [trúnaðargögnin] en þeir mega reyndar ekki tjá sig um þau; almenningur má ekki vita í hvaða stöðu Þorgerður er búin að koma þessu máli áður en til atkvæðagreiðslu kemur,“ segir hann.
