Þjóðfylkingin, flokkur Marine Le Pen, tryggði sér 14 sæti í kosningum til öldungadeildar á franska þinginu í dag.
Kosið var um 178 sæti af 348 sætum á deildinni í 64 af 101 sýslu Frakklands. Kjörnir fulltrúar í hverri sýslu kjósa nýja öldungadeildarþingmenn í helmingi deildarinnar á þriggja ára fresti og sitja þingmennirnir í sex ár í senn. Le Pen, leiðtogi og stofnandi Þjóðfylkingarinnar, segir niðurstöðurnar vera sögulegan sigur.
Flokkurinn tryggði sér sæti í öldungadeildinni í fyrsta sinn árið 2014 undir nafninu Front National og fékk þá tvö sæti. Árið 2023 tryggði flokkurinn sér þrjú sæti á þinginu.
Le Pen hefur staðfest að hún ætli að bjóða sig fram í forsetakosningum á næsta ári. Le Pen var sakfelld í fyrra fyrir að misnota styrki frá Evrópuþinginu til að fjármagna starf flokksins í Frakklandi.
Áfrýjunardómstóll staðfesti dóminn í júlí en stytti refsinguna. Hún ætlar að áfrýja til hæstaréttar. Ekki er ljóst hvort rétturinn kveður upp dóm fyrir forsetakosningarnar sem verða í maí á næsta ári.
