Hótanir í garð ráðamanna eru ógn við lýðræðið og hafa færst í aukana síðustu ár, segir yfirmaður greiningardeildar ríkislögreglustjóra. Öryggisgæsla utanríkisráðherra var aukin til muna eftir að henni bárust grófar og alvarlegar hótanir, sem beindust meðal annars gegn fjölskyldu hennar.
Hótanir þurfa ekki að raungerast til að valda því að fólk geti ekki sinnt hlutverki sínu
Lögregla ber ábyrgð á öryggi æðstu embættismanna og henni ber að tryggja að þeir geti sinnt störfum sínum með öruggum hætti.
Karl Steinar Valsson, sviðsstjóri greiningardeildar ríkislögreglustjóra, segir að hótun þurfi ekki að raungerast í líkamsárás eða skemmdarverk til að valda því að fólk treysti sér ekki til að sinna hlutverki sínu eða starfi.
„Hótunin þarf ekki að fara alla leið í að það sé ráðist að viðkomandi til þess að hún valdi því að það verði óróleiki í öryggi viðkomandi,“ segir hann.
Fylgja fólki eftir í daglegu lífi eða hefja formlega rannsókn
„Þá þurfum við að grípa inn í með einhverjum hætti. Ein leiðin er að tryggja það sem við köllum næröryggi viðkomandi og önnur leið er að fara í formlega rannsókn og hefja skýrslutökur og annað slíkt. Svo það eru nokkrar leiðir sem við getum beitt,“ segir Karl Steinar.
Þorgerður Katrín Gunnarsdóttir utanríkisráðherra lýsti því í viðtali á Bylgjunni í lok síðasta mánaðar að henni hefðu borist alvarlegar hótanir sem væru á borði lögreglu.
Grófar hótanir meðal annars gegn börnum Þorgerðar
Heimildir fréttastofu herma að hótanirnar hafi verið grófar og beinst meðal annars gegn börnum hennar.
Þær voru metnar alvarlegar og öryggisgæsla aukin, til að mynda fylgdi sérsveitarmaður henni eftir þegar hún hljóp í Reykjavíkurmaraþoninu, og eftirlit var við heimili hennar.
Lögregla gerir áhættumat þegar hótanir berast.„Við grípum til þeirra ráðstafana sem við teljum nauðsynlegar á hverjum tíma en ég get staðfest að í flestum tilvikum er verið að tala um tímabundnar ráðstafanir sem við gerum - á meðan við erum að sannfæra okkur um hvernig við lítum á hótanirnar,“ segir Karl Steinar.
Talsvert hefur borið á fréttum af slíkum hótunum síðustu ár, fyrrverandi ráðherrar og borgarstjórar eru á meðal þeirra sem hefur verið ógnað eða hótað.
Fleiri hótanir og oftast í gegnum netið
Karl Steinar segir það hafa færst í aukana að efla þurfi öryggisgæslu þeirra. „Okkur finnst því miður hafa verið fleiri tilvik sem eru að koma upp núna á hverju ári heldur en hefur verið áður fyrr,“
„Þetta eru fyrst og fremst hótanir sem annaðhvort eru hafðar uppi beint til viðkomandi eða á samfélagsmiðlum í þeirra garð,“ segir hann.
Stór hluti þingmanna í alþjóðlegri könnun orðið fyrir ógnunum eða ofbeldi
Niðurstöður alþjóðlegrar könnunar Alþjóðaþingmannasambandsins meðal 519 þingmanna voru birtar fyrr á þessu ári. 71 prósent sögðust hafa orðið fyrir ógnandi hegðun eða ofbeldi frá almenningi, flest í gegnum netið.
Konur verða frekar fyrir slíku, eða 76 prósent þeirra, en 68 prósent karla og í þriðjungi tilfella voru fjölskyldumeðlimir einnig skotmörk. Fólk er síður tilbúið að taka þátt í stjórnmálum og færri vilja mæta í viðtöl.
Karl Steinar segir þessa þróun ógn við lýðræðið. „Kannski þurfum við að líta í spegilinn og spyrja okkur hvernig samfélagi viljum við búa í?“
„Þó að við séum ósátt við skoðanir einhvers eða viðhorf eða annað slíkt þá þýðir það ekki það að við getum haft uppi hótanir í þeirra garð fyrir það,“ segir Karl Steinar.
