Gunnar Þórðarson hélt tónleika í Borgarleikhúsinu í október 2009.
Þar spilaði hann og söng sjálfur úrval þeirra laga sem gert hafa hann að einum ástsælasta dægurlagahöfundi þjóðarinnar. Hér má hlýða á Gunnar syngja lagið Nú blánar yfir berjamó.
Í dag er flaggað við hálfa stöng við ráðhúsið í Reykjanesbæ í minningu Gunnars Þórðarsonar. Það er gert að beiðni Vilhjálms Árnasonar bæjarstjóra.
Vilhjálmur segir Gunnar hafa átt ómetanlegan þátt í að móta þá einstöku tónlistarsögu sem geri Reykjanesbæ að bítlabænum.
„Lög hans og tónlist munu lifa áfram í hjörtum landsmanna um ókomin ár.
Ég hef óskað eftir því að íslenski fáninn verði dreginn í hálfa stöng við ráðhús Reykjanesbæjar á Tjarnargötu og Ásbrú, sem og við aðkomuleiðir að sveitarfélaginu, í virðingarskyni við minningu hans.“
„Fyrir hönd Reykjanesbæjar votta ég eiginkonu hans, börnum, fjölskyldu, vinum og öllum þeim sem syrgja Gunnar mína dýpstu samúð,“ skrifar Vilhjálmur á Facebook-síðu sinni.
Jón Ólafsson og Eyþór Ingi Gunnlaugsson hafa skrifað um Gunnar í dag.
„Blessuð sé minning hans“
Jón Ólafsson, þáttastjórnandi, tónlistarmaður og meðlimur í Nýdönsk, skrifar um Gunnar á Facebook.
„Hetja æsku minnar, vinur, fyrirmynd og einn besti lagasmiður í heimi er fallinn frá. Ég þakka fyrir góð kynni og votta vinum og fjölskyldu samúð mína. Þeir hverfa nú hver á fætur öðrum, jöfrar íslenskrar tónlistar. Þetta ár maður. 2026.“
Jón deilir einnig þessum spilunarlista af Spotify þar sem er að finna úrval laga eftir Gunnar.
„25 lög úr gullkistu Gunnars Þórðarsonar. Blessuð sé minning hans.“
„Frá poppi, kántrí, rokki yfir í óperu“
Eyþór Ingi Gunnlaugsson tónlistarmaður segir Gunnar hafa verið sannan snilling.
„Tónlistar séní og risi í Íslenskri tónlistarsögu er fallinn frá. Ég fékk að vinna aðeins með Gunnari. Maður hélt niður í sér andanum þegar hann síndi manni snilli sína. Fáir hafa gefið þjóðinni annað eins af perlum – frá poppi, kántrí, rokki yfir í operu.
Sannur snillingur.“
Arnar Eggert Thoroddsen, tónlistar- og félagsfræðingur og aðjúnkt við Háskóla Íslands, skrifaði um Gunnar í morgun.
„Risarnir falla einn af öðrum. Ég kynntist Gunnari ágætlega í gegnum tónlistarblaðamannastörf mín á Morgunblaðinu á fyrsta áratug þessarar aldar. Feiminn maður en ávallt kurteis og áran með honum góð. Ég tók fjölda viðtala við hann, vegna Hljóma, Ríó, sólóefnis o.s.frv. og með tíð og tíma þróaðist traust. Okkur fannst gott að spjalla. Vorum rólegir,“ skrifar Arnar Eggert.
„Tók m.a. ævintýralegt viðtal við hann á heimili hans þar sem hann og Raggi Bjarna voru að plögga jólaplötu. Hef aldrei á ævinni hitt ólíkari menn. Það óð á Ragga en Gunnar stóískur, vinalegur og hélt hlutunum á jörðinni.
Samúðarkveðjur til vina og fjölskyldu. Og ég nefni auðvitað snilldargáfu hans á lagasmíðasviðinu en þar átti hann fáa sína líka. Fyrstu tvö útgefnu lög Hljóma 1965, "Fyrsti kossinn" og "Bláu augun þín" sanna það allt saman. Fyrra lagið sígrænn rokkari, hið síðara sígræn ballaða. Ótrúleg lög bæði tvö.
Far í friði vinur.“
Páll Óskar tónlistarmaður minnist Gunnars Þórðarsonar á Facebook.
„Takk, meistari. Takk fyrir allar gjafirnar sem streymdu frá þér til okkar hinna. Svo varstu líka svo cool. Hljómar voru besta bítlahljómsveitin. Trúbrot var besta hippahljómsveitin. Þú & ég var besta íslenska diskóið. Ragneiður er besta íslenska óperan. Það var ekkert sem þú gast ekki tileinkað þér og alltaf var Gunna Þórðar sándið yfir þessu öllu,“ skrifar Páll.
„Hljómagangurinn alltaf spennandi, óvæntur, og svo kom einhver galdur í viðlögunum sem létu lögin dúndrast inn í þjóðarsálina. Poppið þitt var flókið, en hljómaði svo auðvelt. Bestu listaverkin eru alltaf þannig. Þessu ná ekki allir, en sá sem getur samið Þitt fyrsta bros, Bláu augun þín, Ástarsælu, Lífsgleði, Himin og jörð, Gaggó vest, Er hann birtist, Við Reykjavíkurtjörn og Vetrarsól er ekkert minna en meistari á næsta level. Hér er síðasta ljósmyndin sem var tekin af okkur, baksviðs á 80 ára afmælistónleikunum þínum í Hörpu. Ég var svo glaður að fá að vera með. Og ég er svo glaður yfir því að þú hafir verið til. Hvíl í friði, Gunnar Þórðar snillingur.“
Keflavík hefur lengi vel verið kallaður bítlabærinn. Í tímaritinu Vikunni var vikið að því hvers vegna 1. september 1966.
„Keflavík hefur með talsverðum sanni verið kallaður „bítlabærinn“ á Íslandi. Svo mikið er a.m.k. víst, að hér tók fyrst að gæta áhrifa frá brezkri dægurmúsik. Hljómar urðu einna fyrstir til að spila lög Bítlanna hérlendis – þeir hafa haldið áfram um þriggja ára skeið og hafa sennilega aldrei verið í betra formi en einmitt nú,“ segir í tímaritinu.
„Komir þú til Keflavíkur verður þú líka var við óvenju marga bítlakolla á götunum. Unglingarnir virðast fylgjast vel með tízkunni og satt bezt að segja er skammt öfganna á milli í þeim efnum!
Það er líka athyglisvert, hve margir góðir söngvarar hafa komið fram í Keflavík undanfarin þrjú til fjögur ár. Hér eru nokkur nöfn: Einar Júlísson, Engilbert Jensen, Karl Hermansson (þeir hafa allir sungið með Hljómum), Þorsteinn Eggertsson, Rúnar Júlíusson og Þórir Baldursson. –– Þórir hefur annars komið víða við í tónlistarmálum bæjarins. Hann stjórnar karlakór og Lúðrasveit Keflavíkur.
Beztu innlendu dægurlögin hafa og komið frá Keflavík að undanförnu og eiga þeir Gunnar Þórðarson og Þórir Baldursson þar allan heiður skilinn.“
Það er þess vert að nefna að þetta er með fyrstu dæmum á vef Tímarit.is þar sem er að finna tilvísun í „bítlabæinn“.
Egill Eðvarsson, myndlistarmaður og leikstjóri, minnist Gunnars í færslu á Facebook-síðu sinni.
„Þegar ég, smá putti, spurði afa eitt sinn hvað honum fyndist að ég ætti að verða þegar ég yrði stór, svaraði hann. Það skiptir engu hvað þú verður, drengur minn. Þú verður bara að gera gagn. Gagnast landi og þjóð. Afi var hörkuduglegur verkamaður alla sína ævi, náði 100 ára aldri og gerði gagn,“ skrifar Egill.
„Í gær kvaddi þessa veraldlegu tilvist okkar einn minn tryggasti vinur til 55 ára, Gunnar Þórðarson, hljómlistarmaður og tónskáld. Og Gunni var einn þeirra sem svo sannarlega gerði gagn. Einhver fjölhæfasti tónlistarmaður, sem þjóðin hefur nokkru sinni eignast, atorkusamur verkmaður í höll tónlistargyðjunnar, sem skilur eftir sig ógrynni af glitrandi tónlistarperlum, tónlistargulli og gersemum, sem munu lifa með þjóðinni um ókominn tíma… gagnast okkur öllum og gleðja svo um munar.
Takk, elsku vinur, fyrir allt og allt. Tónlistina, samstarfið, vináttuna og væntumþykjuna. Þú varst mér sönn fyrirmynd. Maður sem kunni til verka… og gerðir gagn!“
Góðan daginn.
Gunnar Þórðarson var einn ástsælasti og afkastamesti tónlistarmaður og lagahöfundur landsins. Í þessari frétt er stiklað á stóru og farið yfir margt áhugavert frá þeim fjölmörgu áratugum sem hann kom að íslenskri tónlist.
Í fréttinni er einnig að finna heimildarmyndina Tónskáldið eftir Ágúst Guðmundsson og Jón Þór Hannesson. Heimildarmyndin er í tveimur hlutum og fjallar um ævintýralegan feril Gunnars.
Ég heiti Guðmundur Atli Hlynsson og ætla að fara yfir ýmislegt áhugavert úr ævi Gunnars í þessari fréttavakt í dag. Einnig munu rata hingað viðbrögð landsmanna við andláti Gunnars.
