Fjórir sitja í gæsluvarðhaldi í þágu rannsóknar Lögreglunnar á höfuðborgarsvæðinu á umfangsmiklu fíkniefnamáli, sem snýr að innflutningi á rúmlega 14 lítrum af amfetamínbasa.
Þrír þeirra voru handteknir í viðamiklum aðgerðum Lögreglunnar á höfuðborgarsvæðinu og Tollgæslunnar um miðjan mánuðinn og eru tveir þeirra sagðir starfsmenn Eimskipa, eins og áður hefur verið greint frá í fréttum.
Í tilkynningu frá lögreglunni kemur fram að fjórði einstaklingurinn var handtekinn í síðustu viku. Varðhaldið yfir honum hefur verið framlengt til 5. maí á grundvelli rannsóknarhagsmuna og sama gildir um einn af þeim þremur sem áður voru handteknir.
Hinum tveimur hefur sömuleiðis verið gert að sæta áframhaldandi gæsluvarðhaldi, en nú á grundvelli almannahagsmuna til 25. maí.
Fjórmenningarnir, sem eru íslenskir, eru á þrítugs-, fertugs- og sextugsaldri.
Heimildir DV herma að einn fjórmenninganna sé Albani með íslenskan ríkisborgararétt.
