Þingmenn mega hvorki afrita né vísa beint í þau gögn sem utanríkismálanefnd hefur borist í tengslum við fyrirhugaða þjóðaratkvæðagreiðslu um aðildarviðræður við Evrópusambandið. Efni þessara gagna verður því ekki kynnt almenningi með neinum hætti.
Þetta segir Þórunn Sveinbjarnardóttir, forseti Alþingis, í samtali við mbl.is.
Í gærkvöldi var tilkynnt að öllum þingmönnum yrði veittur aðgangur að gögnunum en fram til þess var aðeins nefndarmönnum utanríkismálanefndar gert kleift að kynna sér efni þeirra.
Þessar vendingar hafa valdið því að greidd verða atkvæði um tillöguna í dag.
Beiðni barst ekki fyrr en í gærkvöldi
Samkvæmt starfsreglum fastanefnda Alþingis er heimilt að binda gögn sem nefndum berst trúnaði og varðveita þau í skjalageymslum.
„Forseti getur, ef um það berst beiðni frá þingmanni sem er ekki fulltrúi í utanríkismálanefnd, veitt öðrum þingmönnum aðgang að trúnaðargögnum nefndarinnar. Þetta er alveg sama aðgangur og fulltrúar nefndarinnar hafa haft, trúnaðurinn er sá sami. Þingmenn geta kynnt sér gögnin og lesið þau en geta ekki afritað þau með neinum hætti eða vitnað beint í þau,“ segir Þórunn um það hvaða trúnaðarreglur gilda nú um gögnin.
Mikið hefur verið rætt um þetta skerta aðgengi að gögnunum í þingsal að undanförnu og því má spyrja af hverju aðgengið að þeim var ekki víkkað fyrr.
„Þær beiðnir sem komið hafa fram í þingsal hafa verið þess eðlis að forseti aflétti trúnað af gögnunum. Ég hef ekkert vald til þess, gögnin eru afhent nefndinni með áskilnaði um trúnað. Það sem gerðist í gær var að ég fékk beiðni frá þingmanni utan nefndarinnar sem vísaði í þessar reglur, slík beiðni hafði ekki komið fram fyrr,“ segir þingforsetinn.
„Það er ekki hægt“
Þórunn situr ekki í utanríkismálanefnd og hafði því ekki aðgang að gögnunum fyrr en í morgun. Hún hefur því ekki kynnt sér þau enn og segist því ekki vita umfang gagnanna. Hún hafi þó heyrt að aðeins sé um eina möppu að ræða.
Gera má ráð fyrir að þorri þingmanna muni líta við í hið svokallaða leyniherbergi í dag og lesa og kynna sér þau gögn sem þar eru.
Verða þessi gögn því ekki kynnt almenningi með neinum hætti?
„Nei, það er ekki hægt. Um það snýst trúnaðurinn, þessi gögn voru afhent í trúnaði,“ svarar Þórunn.
