Lögreglan á höfuðborgarsvæðinu hafði í ýmsu að snúast á höfuðborgarsvæðinu samkvæmt dagbók lögreglu í dag. Meðal verkefna voru innbrot, þjófnaðir, eignaspjöll og líkamsárás auk umferðaróhapps þar sem rafhjóli var ekið á bifreið.

Tilkynnt var um innbrot í bílskúr og þá barst lögreglu einnig tilkynning um eignaspjöll við ónefndan skóla.

Lögregla sinnti jafnframt umferðaróhappi þar sem rafhjóli var ekið á bifreið. Engin slys urðu á fólki í óhappinu.

Afskipti voru höfð af fólki undir áhrifum sem var í bifreið og vaknaði grunur um akstur undir áhrifum. Þá hafði lögregla afskipti af konu vegna vörslu fíkniefna.

Tvisvar var lögreglu tilkynnt um þjófnað í matvöruverslun.

Einnig barst tilkynning um líkamsárás. Málið er til rannsóknar hjá lögreglu og liggja ekki fyrir frekari upplýsingar um atvik málsins að svo stöddu.

Lögregla þurfti auk þess að sinna útkalli í miðborg Reykjavíkur vegna fólks sem virti ekki lokanir þar.

Þá aðstoðaði lögregla sjúkraflutningsmenn í tveimur tilvikum samkvæmt dagbókinni.