Íslenska ríkið og Landsnet höfðu betur fyrir Hæstarétti gegn landeigendum þar sem Suðurnesjalína 2 á að rísa, þar sem dómurinn staðfesti dóm Landsréttar í máli sem snýr að línunni.
Landeigendur höfðu áfrýjað málinu til Hæstaréttar og krafist þess að felld yrði úr gildi ákvörðun umhverfis-, orku- og loftlagsráðherra þar sem Landsneti var heimilað eignarnám til ótímabundinna afnota á landi landeigenda vegna lagningar á Suðurnesjalínu tvö og að í því skyni yrði nánar tiltekinni kvöð þinglýst á jörðina.
Landeigendur vildu meina að nánar tilgreind viðmið sem fram kæmu í þingsályktun um stefnu stjórnvalda um lagningu raflína væru í andstöðu við lög eða þýðingarlaus fyrir úrlausn málsins.
Því hafnaði Hæstiréttur.
Ekki verulegur annmarki
Þá bentu landeigendur á að við undirbúning málsins hefði ekki verið með tölulegum samanburði leitast við að leggja mat á og bera saman rekstrarkostnað á líftíma loftlínu annars vegar og jarðstrengs hins vegar.
Rétturinn taldi þetta ekki verulegan annmarka þar sem í matsskýrslu umhverfisáhrifa mátti finna umfjöllun um þau atriði sem máli skiptu við mat á rekstrarkostnaði og áhættuþáttum á líftíma loftlínu og jarðstrengs.
„Var því talið að Landsnet hefði með fullnægjandi hætti lagt hlutlægan grunn að vali sínu á fyrirhugaðri útfærslu Suðurnesjalínu 2 og þar með umsókn sinni um heimild til eignarnáms,“ segir í dómnum.
