Dularfullt mál skekur nú Indland eftir að hjónin Prateek og Adparna Yadav sneru heim úr ferðalagi Íslandi. Bæði eru þau tengd inn í stjórnmálin þar í landi, í sitt hvoran flokkinn, en fyrir Íslandsheimsóknina var hjónaband þeirra á hrakhólum. Eftir að það birtust af þeim myndir úr Bláa lóninu virtist allt fallið í ljúfa löð en nokkrum dögum seinna var Prateek látinn, aðeins 38 ára gamall. Rannsókn á andláti hans fer nú fram.
Pólitískar andstæður
Prateek Yadav var sonur Mulayam Singh Yadav, stofnanda hins sósíalíska stjórnmálaflokks Samajwadi. Flokkurinn hefur lengi verið valdamikill í hinu fjölmenna Uttar Pradesh fylki í norðurhluta landsins, þar sem búa um 250 milljón manns og finna má höllina Taj Mahal.
Prateek hafði sjálfur að mestu leyti haldið sig til hlés í stjórnmálum landsins en bróðir hans, Akhilesh Yadav er nú formaður Samajwadi flokksins, þingmaður og fyrrverandi fylkisstjóri Uttar Pradesh. Prateek söðlaði um á öðrum sviðum og var heilsufrömuður.
Adparna Yadav, áður Bisht, var eiginkona Prateek frá árinu 2011 en allt annars staðar í pólitík. Hún gekk í hinn hægrisinnaða Bharatiya Janata flokk, eða BJP eins og hann er gjarnan kallaður, árið 2014. Flokk forsætisráðherrans Narendra Modi sem hefur stutt rækilega við hindúa í landinu. Má segja að flokkurinn boði nokkurs konar hindúa þjóðernishyggju. Áður hafði Adparna verið meðlimur í Samajwadi flokknum eins og eiginmaður sinn.
Adparna er varaformaður kvennasambands Uttar Pradesh og áberandi í þjóðfélagsumræðunni þar um árabil. Hún hefur boðið sig fram til þings en ekki náð kjöri. En hún hefur verið talin eiga framtíðina fyrir sér í indverskum stjórnmálum, enda dyggur stuðningsmaður Modi.
Allt í loft upp
Um margra ára skeið virtist þetta alveg ganga. Virtust hjónin eiga gott líf þrátt fyrir að tengjast svo andstæðum pólum í indverskum stjórnmálum. En í janúar síðastliðnum sprakk allt í loft upp.
„Ég ætla að skilja við þessa sjálfselsku konu eins fljótt og ég get,“ skrifaði Prateek í færslu á samfélagsmiðlum þann 19. janúar. „Hún er búin að eyðileggja sambönd mín við fjölskyldu mína. Það eina sem skiptir hana máli er að verða fræg og áhrifamikil.“
Eins og gefur að skilja olli þessi færsla fólki áhyggjum og ljóst var að mikið hafði gengið á í hjónabandinu. En einnig var vitað að Prateek hafði verið að kljást við andlega erfiðleika.
Í ljúfa löð
Nokkrum dögum seinna, þann 28. janúar, birti Prateek hins vegar myndband og sagði málið væri útkljáð. Hjónin hefðu átt samtal og leyst ágreining sinn.
„Þann 19. janúar átti ég í alvarlegum deilum við eiginkonu mína Adparna og eftir það birti ég færslur á samfélagsmiðlum. Hins vegar hefur málið nú verið leyst eftir samtal okkar á milli. Það er enginn ágreiningur á milli okkar núna,“ sagði Prateek.
Þá birti hann annað myndband með eiginkonu sinni með yfirskriftinni: „Hatarar, farið til vítis.“
Samrýmd fjölskylda
Það næsta sem fréttist frá hjónunum er að þau eru komin til Íslands. Birtu þau af sér nokkrar ljósmyndir í Bláa lóninu ásamt ungri dóttur þeirra í mars. Ekki var annað að sjá en að um samrýmda og hamingjusama fjölskyldu væri að ræða.
Skyndileg veikindi
Þetta reyndist hins vegar vera síðasta fjölskylduferðin. Því að í gær, miðvikudaginn, 13. maí var greint frá andláti Prateek Yadav. Prateek, sem var aðeins 38 ára gamall, hafði veikst skyndilega og var fluttur á sjúkrahús í heimaborg sinni Lucknow. Hann var hins vegar úrskurðaður látinn þegar þangað var komið.
„Andlát Prateek Yadav Ji snertir okkur öll mjög mikið. Megi guð veita hinni látnu sálu frið. Með auðmjúkri virðingu,“ sagði í tilkynningu Samajwadi flokksins en mikið hefur verið fjallað um málið í indverskum miðlum.
Líkið rannsakað í þaula
Skyndilegt andlát Prateek, sem var mjög heilsuhraustur, hefur vakið upp margar spurningar. Sérstaklega í ljósi þess sem á undan hafði gengið.
Lík hans er nú til rannsóknar hjá réttarmeinafræðingum. Dánarorsökin er talin vera blóðtappi í lungum. Óvíst er hins vegar hvað olli tappanum, það er hvort það var eitthvað utanaðkomandi efni eða eitthvað annað.
Hefur hjartað hans og blóðtappinn í lungunum verið fjarlægt til frekari rannsóknar sem og sýni úr fleiri líffærum til að sjá hvort einhver eiturefni finnist.
