Undirbúningur er í fullum gangi fyrir stórtónleika Kaleo og fleiri listamanna á Þingvöllum 20. júní. Á annað þúsund manns verða þar við gæslu og ýmis störf. Þjóðgarðsvörður segir þess gætt að náttúra raskist ekki.
„Hér verður dagskrá sem hefst með ávarpi og kórsöng og síðan koma Kaleo,“ segir Jakob Frímann Magnússon einn þeirra sem stendur að tónleikahaldinu.
Okkur og Íslendingum helgur staður
Hugmyndin að því að halda tónleika á Þingvöllum kom reyndar frá Jökli Júlíussyni söngvara Kaleo.
„Við erum mjög spenntir að fá að spila í okkar þjóðgarði, það er búið að vera draumur hjá mér lengi,“ segir Jökull. „Þetta er okkur og Íslendingum mjög helgur staður og ég lít svo á að þetta sé frábært tækifæri til að smala saman Íslendingum og búa til minningar á Þingvöllum.“
Fullkomin staðsetning fyrir tónleika
Ruben Pollock gítarleikari í Kaleo tekur undir þetta: „Þetta er eiginlega fullkomin staðsetning fyrir tónleika, ótrúlegt en sagt.“
„Þetta er alveg einstakur staður,“ segir Davíð Antonsson trommari Kaleo. „Hér kom fólk saman í gamla daga og söng saman og setti í lög - ég held að þetta verði alveg geggjað.“
Þarna verður fjöldi annarra listamanna, þeirra á meðal Emilíana Torrini, Mugison, Stuðmenn, Helgi Björnsson, Hjálmar, GDRN, KK og Júníus Meyvant.
Á annað þúsund manns verða að störfum
20.000 miðar eru í boði og stór hluti þeirra er seldur. Tugir hafa komið að undirbúningi og þarna verður margt um manninn á tónleikadaginn.
„En þeir sem starfa hér á svæðinu á deginum sjálfum eru á annað þúsund manns. 450 við gæslu og umferðarstjórnun og síðan eru þeir sem sinna veitingum og öðrum störfum af ýmsum toga,“ segir Jakob.
Fallegt, skemmtilegt og eftirminnilegt
Í þessum hópi eru um 100 lögreglumenn og fjöldi björgunarsveitarmanna af Suðurlandi. Þá verður öryggismyndavélum komið upp víða um svæðið.
Jakob segir mikla vinnu hafa verið lagða í umferðarstjórnun - en vonast er til að sem flestir komi með rútum og þannig megi komast hjá mikilli umferð.
„Við erum öll í sama liðinu um að gera þetta fallegt, skemmtilegt og eftirminnilegt,“ segir hann.
Eingöngu haldið á röskuðu landi
Einar Á. E. Sæmundssen, þjóðgarðsvörður á Þingvöllum, segir að gætt hafi verið að því að tónleikarnir og það sem þeim fylgi verði eingöngu á svokölluðu röskuðu landi - það er þar sem þegar hafa verið gerðar breytingar á landslaginu.
„Á vegum, bílastæðum, göngustígum, þar sem er hart yfirborð og svo á þessum túnum hérna sem eru sléttuð tún sem voru eiginlega sett upp til að halda hátíðir,“ segir Einar.
Tjaldstæðin verða lokuð þessa helgi og um miðjan dag þann 20. verða Þingvellir lokaðir öllum nema tónleikagestum. Spurður hvort það sé réttlætanlegt að rukka fólk fyrir að heimsækja þjóðgarð segir Einar að það hafi verið mat Þingvallanefndar. „Við teljum að við getum gert þetta og viljum sjá hvernig þetta fer.“
Enginn Þingvöllur annars staðar en hér
Jakob segir að líklega hefði verið hægt að velja stað, sem væri auðveldari til tónleikahalds en Þingvellir. „Það hefði verið mun auðveldara að velja flesta aðra staði. En það er enginn Þingvöllur annars staðar en hér.“
Innslag um tónleikana úr kvöldfréttatíma RÚV má sjá hér að neðan.
