Yfir 1.100 blaðsíður úr persónulegum dagbókum Anthony Fauci hafa verið gerðar opinberar og varpa nýju ljósi á það sem fór fram á bak við tjöldin á fyrstu vikum kórónuveirufaraldursins.
Rand Paul, formaður heimavarnarnefndar öldungadeildar Bandaríkjaþings, birti gögnin undir yfirskriftinni Tony’s Diary: What He Wrote Privately vs. What He Said Publicly. Færslurnar ná frá desember 2019 til desember 2022 og innihalda lýsingar Fauci á fundum, símtölum, fjölmiðlaviðtölum og umræðum innan bandarískra stjórnvalda um faraldurinn.
Gögnin hafa sérstaklega vakið athygli vegna þess hversu alvarlega Fauci og hópur þekktra veirufræðinga ræddu möguleikann á því að veiran ætti uppruna sinn á rannsóknarstofu strax í janúar og febrúar 2020.
„Við gátum ekki látið þetta liggja“
Í færslu frá 31. janúar 2020 lýsir Fauci símtali sem hann fékk frá Jeremy Farrar, þáverandi forstjóra Wellcome Trust, sem tengdi hann við veirufræðinginn Kristian Andersen.
Samkvæmt lýsingu Fauci höfðu vísindamennirnir sérstakar áhyggjur af svokölluðum furin-klofningsstað í gaddapróteini veirunnar. Fauci skrifaði að þeir hefðu talið mögulegt að breytingar þar hefðu verið settar inn viljandi og að veiran hefði síðan mögulega sloppið fyrir slysni af rannsóknarstofu.
Daginn eftir var haldinn stærri símafundur með tólf vísindamönnum og embættismönnum, þar á meðal Francis Collins, Kristian Andersen, Christian Drosten, Ron Fouchier, Edward Holmes og Robert Garry.
Í dagbókinni skrifar Fauci að ekki hafi verið samstaða um hvort um viljandi ísetningu erfðaefnis gæti hafa verið að ræða. Fouchier taldi að breytingarnar gætu hafa orðið náttúrulega og Drosten tók undir það. Fauci segir hins vegar að aðrir á fundinum hafi talið viljandi ísetningu mögulega.
Hann vísaði jafnframt til rannsókna Shi Zhengli við Veirufræðistofnunina í Wuhan á kórónuveirum og skrifaði að vegna þessara aðstæðna gætu þeir ekki einfaldlega látið málið liggja. ABC News staðfestir þessa lýsingu úr dagbókinni en bendir á að hún sýni umræðu um möguleikann, ekki niðurstöðu um að veiran hafi verið búin til á rannsóknarstofu.
Sagði Wuhan markaðinn ekki hafa verið upprunann
Dagbókin sýnir einnig að Fauci taldi þegar 26. janúar 2020 að fyrstu smitin hefðu átt sér stað áður en faraldurinn varð sýnilegur á sjávarfangsmarkaðnum í Wuhan.
„Nú vitum við að markaðurinn var ekki uppruninn, hann var magnari,“ skrifaði Fauci og taldi þá að veiran hefði einhvers staðar borist úr dýri í mann.
Sú færsla hefur verið notuð af Paul sem dæmi um upplýsingar sem Fauci hafi haft snemma í faraldrinum. AP bendir þó á að Fauci hafi skömmu síðar sagt nánast það sama opinberlega og lýst markaðnum sem stað þar sem útbreiðslan hefði magnast, frekar en að fyrsta smitið hefði endilega átt sér stað þar.
Sagði FBI „ekki hafa hugmynd um hvað þeir væru að tala um“
Færslurnar sýna jafnframt hvernig afstaða Fauci hafði þróast þegar leið á faraldurinn.
Eftir leynilegan fund með þjóðaröryggisráði Bandaríkjanna 7. júlí 2021 skrifaði Fauci að honum hefði orðið ljóst að FBI hefði ekki hugmynd um hvað þeir væru að tala um varðandi uppruna veirunnar.
FBI taldi þá að leki frá rannsóknarstofu væri líklegasta skýringin. Fauci taldi rökin fyrir þeirri niðurstöðu ekki ganga upp og sagði sjálfur vísbendingar sýna fram á að næstum öruggt væri að veiran ætti sér náttúrulegan uppruna. Hann tók þó sérstaklega fram að hann héldi áfram að vera opinn fyrir möguleikanum á leka frá rannsóknarstofu.
Óttaðist að þögn liti út eins og yfirhylming
Í maí 2021 lýsti Fauci síðan mikilli gremju yfir því að upplýsingafulltrúar bandaríska heilbrigðisráðuneytisins vildu ekki að NIH svaraði opinberlega spurningum um styrki sem tengdust rannsóknum í Wuhan.
Fauci taldi þetta vera mistök og skrifaði að ef NIH svaraði ekki ásökunum myndi það líta út eins og stofnunin væri að hylma yfir einhverju.
Paul segir dagbækurnar sýna mun á því hversu opinskátt mögulegur rannsóknarstofuuppruni var ræddur í einkasamtölum í upphafi faraldursins og því hvernig umræðan þróaðist opinberlega síðar. AP og ABC benda hins vegar á að dagbækurnar sýni einnig mikla óvissu á fyrstu vikum faraldursins og að sumar færslur Fauci séu í samræmi við það sem hann sagði opinberlega á sama tíma. Enn hefur ekki verið endanlega sýnt fram á hvort SARS-CoV-2 barst náttúrulega úr dýrum í menn eða hvort veiran hafi sloppið af rannsóknarstofu.
Dagbækurnar voru birtar skömmu áður en Fauci kom fyrir nefnd Pauls í gær. Þar neitaði hann ítrekað að svara spurningum og vísaði meira en hundrað sinnum til fimmtu viðauka bandarísku stjórnarskrárinnar, sem verndar einstaklinga gegn því að þurfa að bera vitni gegn sjálfum sér.
