Meirihluti fjárlaganefndar Alþingis leggur ekki til breytingar á þeim niðurskurði sem boðaður hefur verið á framhaldsskólastiginu í fjármálaáætlun.
Minnihluti nefndarinnar segir það ekki ganga upp að ætla að lyfta grettistaki í menntakerfinu á sama tíma og draga á saman seglin í fjárveitingum til framhaldsskóla.
Í nýrri fjármálaáætlun er ráðgert að fjárframlög til framhaldsskóla dragist saman um 7,1% á næstu fimm árum, fari úr 53,2 milljörðum árið 2027 í um 49,4 milljarða árið 2031.
Félag framhaldsskólakennara hefur gagnrýnt áformin harðlega og segir að sennilega sé um að ræða meiri niðurskurð en áður hefur sést hér á landi á skólastiginu.
Fjögurra milljarða lækkun
Ólíkt meirihlutanum leggur minnihluti fjárlaganefndar til breytingar á áformunum.
Í minnihlutaálitinu er það rakið að fjárframlög til skólastigsins muni dragast saman um tæpa fjóra milljarða á næstu fimm árum ef fram heldur sem horfir.
Þá segir meðal annars að áformin skjóti skökku við ef horft sé til yfirlýstra markmiða ríkisstjórnarinnar í menntamálum.
„Nýverið kynnti ríkisstjórnin metnaðarfulla menntastefnu til næstu tíu ára þar sem til stendur að lyfta grettistaki á ýmsum sviðum menntakerfisins. Fyrsti minni hluti fær ekki séð, líkt og með svo margt annað í fjármálaáætluninni og nefndaráliti meiri hlutans, hvernig sú stærðfræði getur gengið upp,“ segir í álitinu.
„Ýmsar áskoranir blasa við framhaldsskólastiginu, m.a. hvað varðar breytta samsetningu nemendahópsins, og ekki verður glöggt séð hvernig það fer saman að hefja stórsókn samhliða því að draga saman seglin í fjárveitingum til skólastigsins.“
