„Þú færir ekki af stað í þetta ef þú tryðir ekki að þú gætir haft áhrif og við viljum lifa í þannig samfélagi,“ segir Daði Már Kristófersson, fjármála- og efnahagsráðherra, um hinn farsæla undirskriftalista gegn kílómetragjaldinu sem var afhentur ráðherranum fyrr í dag.
Framkvæmd gjaldsins hefur verið gagnrýnd, meðal annars vegna mismælinga og sekta, og hafa tæplega 42.000 manns sett nöfn sín á listann sem Maria Csizmás stendur fyrir.
Býr til þrýsting
Telurðu að þessi listi geti haft einhver áhrif?
„Já, hann gerir það og hefur gert það nú þegar. Þetta býr til þrýsting á að laga framkvæmdina og þess vegna hefur þetta raunverulega hjálpað okkur að gera þetta betur,“ segir Daði Már í samtali við mbl.is og bætir jafnframt við að ráðuneytið sé opið fyrir öllum hugmyndum um hvernig sé hægt að gera betur.
„Þetta er auðvitað hluti af langri vegferð. Við erum að horfa á orkuskipti í samgöngum. Það var búið að innleiða þetta fyrirkomulag fyrir rafmagnsbíla því að eitthvert fyrirkomulag varð að vera. Við gátum ekki haft gamla fyrirkomulagið þar.“
Allur bílaflotinn, óháð orkugjafa, hafi verið að þróast í átt að rafmagnsbílunum með stöðugt meiri nýtni, sem sé jákvætt en þýði líka að komin hafi verið upp staða þar sem gamla fyrirkomulagið hafi verið pínu ósanngjarnt. Það hafi lagt þyngri byrðar á eldri bíla heldur en yngri og þess vegna hafi breytinga verið þörf.
„Svo er það auðvitað líka þannig, og það gleymist oft í þessari umræðu, að fyrir þungu bílana hefur þetta fyrirkomulag verið mjög lengi og þess vegna var þetta raunverulega fyrst og fremst kerfisbreyting fyrir minni bíla. En varðandi framkvæmdina þá hefur þetta skipt okkur mjög miklu máli.“
„Það þarf mikinn kjark“
Hvað finnst þér um þetta framtak?
„Mér finnst þetta mjög impónerandi, ég verð að viðurkenna það, og eins og ég sagði við Maríu: mér finnst alveg sérstaklega impónerandi að einhver sem er ekki úr íslensku málumhverfi skuli ráðast í þetta vegna þess að það þarf mikinn kjark, og þess vegna ber ég mikla virðingu fyrir því að hún sérstaklega hafi gert þetta.
Mér finnst líka bara almennt að almenningur láti sig stefnumótun varða – það er merki um gott samfélag, vegna þess að þú færir ekki af stað í þetta ef þú tryðir ekki að þú getir haft áhrif og við viljum lifa í þannig samfélagi.“
