Spánverjar ganga að kjörborðinu 29. nóvember, hálfu ári áður en kjörtímabilinu átti að ljúka. Pedro Sánchez, forsætisráðherra Spánar, tilkynnti í dag að hann hefði ákveðið að efna til þingkosninga.
Frumvarp ríkisstjórnarinnar um breytingar á lögum um húsnæðismál náði ekki fram að ganga í síðustu viku. Meðal þess sem stjórnin vildi gera var að koma í veg fyrir útburð leigjenda og bæta stöðu þeirra.
Mikil mótmæli hafa verið á Spáni síðustu daga þar sem fólk hefur krafist úrbóta í húsnæðismálum. Mikla athygli vakti þegar öldruð kona var borin út af heimili sínu eftir að húsaleiga hennar hafði verið hækkuð til mikilla muna.
Þegar Sánchez boðaði til kosninga sagði hann að ríkisstjórnin þyrfti að fá aukinn stuðning við áform sín um úrbætur á húsnæðismarkaði. Hann leiðir minnihlutastjórn sem tókst ekki að afla þeirra atkvæða sem þurfti til að frumvarpið yrði að lögum.
Sánchez hefur verið forsætisráðherra frá 2018.
Líklegast er talið að Lýðflokkurinn, sem er miðhægriflokkur, verði stærstur á spænska þinginu eftir næstu kosningar líkt og þær síðustu. Þá tókst honum ekki að mynda ríkisstjórn. Nú er talið að hann þyrfti að starfa með þjóðernissinnaða hægrijaðarflokknum Vox til að mynda ríkisstjórn.
Fréttin hefur verið uppfærð.
