Andy Burnham, forsætisráðherra Bretlands, hefur beðið landsmenn að taka sér andartak til íhugunar eftir að Jason Arday, prófessor við Cambridge-háskóla, fannst látinn. Burnham lýsir dauða Arday sem harmleik. Hann fannst látinn stuttu eftir að hann sagði af sér vegna ásakana um ritstuld.
Arday, sem var 41 árs, fannst látinn á heimili sínu í gær. Mikið fjölmiðlafár var í kringum hann stuttu fyrir dauða hans. Deilur hófust þegar Nathan Cofnas, sem starfaði fyrir Cambridge-háskóla en var sagt upp 2024, sakaði Arday um ritstuld. Sjálfur skilgreinir Cofnas sig sem kynþáttaraunsæismann, sem felur í sér að og trúir að það sé líffræðilegur munur á kynþáttum mannkynsins.
Sjálfur neitaði Arday ásökunum og sagði að rekja mætti villur í skrifum hans til einhverfu og hvernig hann leitaðist við að skilja upplýsingar með því að herma eftir þeim. Keimlíkar villur mætti finna í skrifum annarra fræðimanna. Einnig voru þó uppi efasemdir um framlög Arday til líknarmála, líkt og að hann hefði hlaupið 30 maraþon á 35 dögum og safnað háum upphæðum fyrir góðgerðasamtök.
Yngstur til að fá stöðu prófessors
Arday varð á sínum tíma yngsti svarti maðurinn til þess að fá stöðu sem prófessor við Cambridge-háskólann sem er einn sá virtasti í heiminum. Hann var þá 37 ára.
Gagnrýnendur Arday og Cambridge vildu meina að háskólinn hefði gert mistök við yfirferð á bæði hæfni og afrekum hans í tilraun til þess að skilgreina sig sem fjölbreytta stofnun.
Fjöldamargir úr fræðasamfélagi Bretlands minntust Arday í dag og margir segja ásakanirnar á hendur honum sprottnar af kynþáttafordómum. Fjölskylda Arday sagði í yfirlýsingu að fjölmiðlaáreitið hefði reynst honum um megn.
