Fluglitakóði fyrir Bárðarbungu er á gulu eftir öfluga jarðskjálftahrinu í eldstöðinni sem hófst í gærkvöldi og stóð yfir fram á nótt. Um 400 jarðskjálftar hafa mælst frá því að hrinan hófst, sá stærsti var 4,8 að stærð. Enginn gosórói mældist þó þar í nótt.
Sennilega öflugasta hrinan frá síðasta gosi
Hrinan hófst um kvöldmatarleytið í gær. Skjálftavirknin var mest til klukkan þrjú í nótt en síðan hefur dregið úr henni. Alls hafa mælst yfir fjögur hundruð jarðskjálftar, þar af átta sem mældust stærri en þrír og tveir sem voru yfir fjórir að stærð. „Þetta var óvenju mikið. Þetta er nú sennilega öflugasta svona hrinan síðan öskjusiginu lauk fyrir ellefu árum,“ segir Magnús Tumi Guðmundsson, prófessor í jarðeðlisfræði.
Bárðarbunga er eitt stærsta eldstöðvakerfi landsins, er um 190 kílómetra langt og nær allt að 25 kílómetrum að breidd. „Þar er mesta kvikusöfnun sem við höfum eiginlega séð síðan mælingar hófust, ef svo má að orði komast, það er hátt í einn rúmkílómetri af kviku sem hefur safnast fyrir síðustu tíu árin,“ segir Magnús Tumi.
Hann segir að þrátt fyrir óvenju öfluga hrinu sé ólíklegt að hún sé merki um að gos sé í vændum. „Við getum ekki dregið beina slíka ályktun.“
Gulur litakóði en ekki merki um gosóróa
Skömmu fyrir klukkan eitt í nótt hækkaði Veðurstofan fluglitakóða upp í gulan. Það þýðir að eldstöð sýni merki um virkni umfram venjulegt ástand. Enginn gosórói mældist þó á svæðinu í nótt.
„Í fyrsta lagi held ég að við ættum ekki að reikna með því að það gjósi á næstunni í Bárðarbungu,“ segir Magnús Tumi. „Hún er eins og svona glas sem er orðið núna hálffullt og er sennilega að fyllast, en það er ekki hægt að fullyrða neitt.“
Síðast gaus Bárðarbunga 2014 þegar sprunga opnaðist norðan við Vatnajökul, í Holuhrauni. Magnús Tumi segir brýnt að fylgjast vel með þróun mála í Bárðarbungu. „Það er ekki hægt að gefa sér að þetta gerist ekkert fyrr en eftir tuttugu ár, þó að það sé kannski líklegast. Við verðum bara að fylgjast með, því að náttúran kemur okkur oft á óvart.“
