Höllu Líf og Ingimar hafði lengi langað í garð, og hund, og duttu því í lukkupottinn þegar þau festu kaup á íbúð með garði á Seltjarnarnesi. Þar geta þau borðað bæði morgunmat og kvöldmat í góðu veðri og njóta þess að gera garðinn huggulegan.
Halla Líf Hjálmarsdóttir og unnusti hennar, Ingimar Þórhallsson, eru eigendur búðarinnar Nomad í Reykjavík en þau hafa komið sér vel fyrir á heimili sínu á Seltjarnarnesi. Íbúðina keyptu þau fyrir rúmum tveimur árum og hafa unnið að því að koma sér og hundinum sínum vel fyrir. Eitt af því sem þau gerðu til að gera íbúðina að sínu draumaheimili var að búa sér til fallega útiaðstöðu en þau hafa nýtt garðinn sinn einstaklega vel.
Halla segir að þau bæði hafi mjög gaman af því að sitja úti í garði í góðum félagsskap og njóta góðra stunda.
„Við Ingimar eigum og rekum verslunina Nomad Reykjavík í miðbænum. Við myndum kalla verslunina okkar lífsstíls- og gjafavöruverslun en vörurnar okkar tengjast mikið náttúrunni. Við bjóðum upp á einstakar vörur og einnig okkar eigin hönnun. Við erum með skartgripalínu sem heitir Tíbrá by Nomad og innblásturinn fyrir skartið kemur aðallega frá hafinu og ströndum landsins. Við eyðum miklum tíma á ströndinni þar sem ég leik mér á brimbretti og Ingimar er ljósmyndari og viðfangsefnið er oftast strönd og sjór,“ segir Halla Líf.
Hvar eruð þið búsett?
„Við fundum draumaíbúð á Seltjarnarnesi og festum kaup á henni í lok árs 2023. Það sem heillaði okkur mest við íbúðina var stór og skjólgóður garður sem snýr til suðurs. Einnig var nýbúið að taka allt í gegn og bæta við fallegri sólstofu en frá henni er gengið beint út á stétt í garðinn. Eftir að hafa búið í miðbænum með engan garð þá var þetta fullkomið fyrir okkur og við fengum okkur loksins hund en það hafði alltaf verið draumur hjá okkur.“
Notar ný húsgögn í bland við notuð
Halla Líf og Ingimar fóru fljótt að leita leiða til að geta nýtt útisvæðið og stéttina í garðinum sem best.
„Um leið og vorið kom 2024 fórum við að skoða útihúsgögn. Við fundum fallegt sófasett með sófa, borði og tveimur stólum í Jysk. Settið er á stéttinni við sólstofuna þar sem gengið er út í garð og sólin skín þar á morgnana; það er æðislegt að borða morgunmatinn þar.
Við fengum einnig gamalt útiborð og stóla frá ömmu og afa, og við keyptum sandpappír, grunn- og útimálningu og gerðum það upp. Borðið og stólarnir eru á stéttinni við hinn vegginn á sólstofunni og þar sitjum við mikið seinnipartinn og þegar veður leyfir borðum við stundum kvöldmatinn þar.
Við endurnýttum einnig gamalt grill frá foreldrum mínum. Eins gaman og það er að kaupa ný húsgögn þá finnst mér líka gott að gefa gömlum hlutum nýtt líf og oft getur maður fundið eitthvað sniðugt á nytjamörkuðum. Ég fann til að mynda handsmíðaðan geymslukassa í Góða hirðinum og hann nýtist vel undir öll verkfæri og annað sem við notum í garðinum. Oft getur maður líka fundið luktir og blómapotta fyrir lítið en það getur verið svo fallegt að blanda mismunandi litum og áferðum saman en það gefur svæðinu skemmtilegan karakter.“
Aðspurð segist hún hafa lært sitthvað við að gera garðinn sinn fínan og telur að litlir hlutir geti gert gæfumuninn.
„Ef ég ætti að gefa einhverjum ráð um hvernig er best að nýta útisvæði hjá sér þá finnst mér alltaf huggulegt að vera með sumarblóm og tré í blómapottum og reyna að velja eitthvað sem endist út sumarið. Það er svo huggulegt að sitja úti með kaffibolla og horfa á falleg blóm í kringum sig. Það er líka hægt að nota útimottur og rafmagnshitara, það gerir svæðið ennþá betra. Svo er alltaf gaman að skoða innblástur í gömlum tímaritum og á Pinterest.“
Hefurðu mikinn áhuga á hönnun?
„Við höfum bæði alltaf haft mikinn áhuga á hönnun og list en það er einstaklega gaman að gera fínt í garðinum og skapa svæði sem er bæði notalegt fyrir okkur að slaka á í og einnig til að bjóða fjölskyldu og vinum til að njóta með okkur.
Við eigum bæði afmæli að sumri til og það er æðislegt að halda upp á það í garðinum heima. Ég verð þrítug núna í sumar og planið er einmitt að halda upp á það í garðinum og leigja kannski stórt hvítt tjald og skreyta það fallega með ljósum og skapa notalega stemningu fyrir veisluna,“ segir Halla Líf spennt.
