Breska þinghúsið, eða Westminsterhöll, er í mikilli hættu á að verða eldi í anda Notre Dame að bráð ef brýnum úrbótum á húsinu verður áfram frestað. Þetta kemur fram í áliti fjárlaganefndar breska þingsins.
Hluti byggingarinnar er yfir 900 ára gamall og hún er á heimsminjaskrá UNESCO. Hún er víða úr sér gengin. Hrunið hefur úr múrverki, raflagnir eru orðnar gamlar og slitnar, húsið lekur reglulega og enn er mikið af asbesti í því.
Nefndin segir að seinkun á endurbótunum hafi leitt til þess að þær verði dýrari. Þá sé hætta á hræðilegum mistökum sem skaði orðspor og þjóðaranda Breta. Geoffry Clifton-Brown, formaður fjárlaganefndarinnar, sagði þegar hann kynnti yfirlýsinguna að afleiðingar aðgerðaleysis gætu til dæmis orðið að ljósin í þingsalnum myndu slokkna við þingsetningu. „Hugsið ykkur fréttamyndir af eldtungum í anda Notre Dame teygja sig út um þak byggingarinnar, með þeim afleiðingum að arfleifð okkar hverfur eða, það sem verra er, fólk slasast eða deyr.“
Endurbætur gætu hafist 2032
Þingið hafði árið 2018 samþykkt tímabundinn flutning svo hægt væri að ráðast í viðgerðirnar. Nú eru komnir fram tveir valkostir um hvernig framkvæmdunum verði háttað. Annar þeirra gerir ráð fyrir að farið verði í allt húsið í einu og þingið færi sig á meðan. Kostnaðurinn yrði rúmir 15 milljarðar sterlingspunda, ríflega 2.500 milljarðar íslenskra króna, og framkvæmdirnar tækju 24 ár. Hinn felur í sér að viðgerðirnar verði teknar í skrefum og að hámark 30% starfsfólks verði á staðnum á meðan. Þar er kostnaður áætlaður yfir tvöfalt meiri, eða 39 milljarðar sterlingspunda, og framkvæmdir myndu þá taka allt að 61 ár.
Báðar þessar áætlanir gera ráð fyrir að framkvæmdir hefjist árið 2032. Fyrir áramót verður lögð tillaga fyrir þingið um 3 milljarða punda fjárveitingu í verkið næstu sjö árin. Þingnefndin varar við að eftir því sem beðið er lengur eykst bæði kostnaðurinn við framkvæmdir og árlegur viðhaldskostnaður.
