Veitur hafa gert ráðstafanir til að fyrirbyggja litabreytingar í Varmá. Þar verða boraðar fjórar vinnsluholur í umfangsmestu jarðhitaleit Veitna í fimmtíu ár.
Upplýsingafulltrúi segir Veitur leggja ríka áherslu á því að tryggja að framkvæmdirnar hafi ekki neikvæð áhrif á umhverfið og lífríki í grennd við ána.
Litamengun setti mark sitt á Varmá í Mosfellsbæ í síðustu viku þegar mulningur komst í mengunarvarnir Veitna. Mengunin barst úr Skammadal þar sem fyrirtækið vinnur að umfangsmikilli jarðhitaleit.
Til að bregðast við menguninni hafa Veitur komið upp nýrri miðlægri svarfþró sem nýtist fyrir allar holurnar sem verða boraðar í Skammadal.
„Við gerðum þessa svarfþró og hún hægir á vatninu sem kemur frá bornum. Borinn þarf töluvert mikið vatn til þess að virka og þegar vatnið kemur upp aftur berst með því bergmylsna og annað slíkt,“ segir Silja Ingólfsdóttir, upplýsingafulltrúi Veitna.
„Það er fínefnið sem er erfiðast að taka úr og þess vegna erum við að gera svona stóra svarfþró í Skammadal sem hægir enn frekar á vatnsrennslinu. Þá hafa fínefnin tækifæri til þess að setjast niður á botninn þar.“
„Við tökum þessu mjög alvarlega“
Í gær var gert hlé á borun til þess að hægt væri að klára nýja og stærri svarfþró sem ætlað er að grípa efnið sem berst upp með borunum. Stefnt er að því að halda framkvæmdunum áfram síðar í dag.
„Á meðan svarfþróin er að taka sig berst mold úr henni með vatni í Varmá og litar hana brúna. Þannig verður það einhverja daga í viðbót en það er bara mold,“ segir Silja.
Framkvæmdir Veitna voru stöðvaðar í síðustu viku eftir að mengunarinnar varð vart og fyrirtækið fékk frest þar til í dag til að gera úrbætur. Silja segir skiljanlegt að fólki sé brugðið við að sjá litabreytingar á ánni.
„Við tökum þessu auðvitað mjög alvarlega og vinnum náið með eftirlitsaðilum af því að lífríkið og umhverfið á auðvitað að njóta vafans eins og alltaf.“
Hörður Þorsteinsson, framkvæmdastjóri heilbrigðiseftirlits Garðabæjar, Hafnarfjarðar, Kópavogs, Seltjarnarness og Mosfellsbæjar, segir það óviðunandi að áin mengist með þessum hætti. Brýnt sé að finna varanlega lausn.
„Vonandi dugar þessi svarfþró sem er verið að setja til þess að fyrirbyggja þetta en við tökum stöðuna þegar þetta er komið í gagnið,“ segir Hörður.
Hörður segir borunina ekki hafa verið gerða með sama hætti og heilbrigðiseftirlitið hafi viljað.
„Við stöðvuðum framkvæmdir í síðustu viku og þá voru ákveðnar úrbætur sem dugðu ekki. Þannig að það hefði í sjálfu sér átt að stöðva starfsemina aftur þar til það væri búið að leysa þá mengun sem er í dag. En það var ákveðið að gefa þeim frest þannig að við skulum bara vona að þetta dugi.“
