„Þú getur alveg byrjað að endursenda dót aftur til landanna sem gáfu það. Finndu út hvað þú vilt ekki og sendu það til baka eins fljótt og hægt er,“ sagði Richard Grenell, yfirmaður Kennedy-miðstöðvarinnar í Washington, í tölvupósti til Josef Palermo, sýningarstjóra safnsins, í október í fyrra.
Tölvupósturinn er hluti af gögnum sem The New York Times byggir á í umfjöllun sinni um það hvernig Donald Trump Bandaríkjaforseti og stuðningsmenn hans hafa reynt að gjörbreyta Kennedy-miðstöðinni.
Mikið hefur verið rætt um baráttu Trumps fyrir að kenna miðstöðina við sjálfan sig. Hann skipaði nýja stjórn yfir The John F. Kennedy Center for the Performing Arts og lét bæta sínu nafni fremst í heiti stofnunarinnar og efst í merkinguna á framhlið þess. Dómstólar hafa síðar dæmt þá nafnbreytingu ólöglega án samþykkis þingsins.
The New York Times greinir frá því í dag að yfirmenn stofnunarinnar hafi unnið skipulega að því að fjarlægja listaverk stofnunarinnar og velja inn ný í staðinn.
Meðal þeirra sem áttu að víkja voru verk sem erlend ríki gáfu í minningu Johns F. Kennedy heitins, fyrrverandi forseta Bandaríkjanna. Eitt þeirra var safn viðarskúlptúra frá Gana sem tákna sorg Afríku yfir andláti hans.
Núverandi og fyrrverandi starfsmenn miðstöðvarinnar veltu því upp hvort það væri vegna þess að Trump væri illa við verkið. Talsmenn Hvíta hússins vísuðu því á bug. Fulltrúar Kennedy-miðstöðvarinnar neituðu að tjá sig.
Helst datt mönnum í hug að endursenda óæskileg verk til gefenda, selja eða eyðileggja þau
Meðal þeirra verka sem hafa verið sett upp í safninu eru upphleypt gyllt listaverk með mannsmyndum og byggingum úr bandarískri stjórnmálasögu. Þeirra á meðal eru verk sem sýna Trump vígreifan hefja hönd til himins skömmu eftir að honum var sýnt tilræði, Robert F. Kennedy heilbrigðisráðherra og fjárfestinn Elon Musk.
Höfundar verkanna er ekki getið á sýningunni en The New York Times segir að talið sé að höfundurinn sé Trish Duggan sem hefur stutt Trump dyggilega. Hvorki hún né stofnunin tjáðu sig um slíkt.
Kennedy-miðstöðin hefur frá upphafi reitt sig á fjárframlög frá fjársterkum einstaklingum til að standa straum af kostnaði við starfsemina. Það er í samræmi við löggjöfina sem gildir um hana. Markmiðið var að stofnunin væri óháð flokkadráttum þó að hún væri til minningar um John F. Kennedy.
Trump skipaði nýja stjórn yfir miðstöðina þar sem stuðningsmenn hans ráða för. Það olli óánægju. Margir listamenn hættu við að koma þar fram og hætt var við sýningar annarra. Styrkjendur drógu sig í hlé.
Trump hefur freistað þess að setja sitt mark á stofnunina en ekki fengið að ganga jafn langt og hann hefur viljað, meðal annars með nafnabreytingunni. Stjórn miðstöðvarinnar samþykkti á dögunum að loka henni í tvö ár meðan viðgerðir færu fram. Trump, sem er formaður stjórnarinnar, sagði að viðgerðir hæfust ekki fyrr en ákvörðun dómstóla um að meina honum að setja nafn sitt á miðstöðina yrði snúið við.
Hann sagði ríkisstjórn sína vera þá einu sem gæti lagfært miðstöðina sem þarfnaðist mikils viðhalds.
„Mér finnst að Trump-stjórnin ætti að njóta viðurkenningar. Vegna þess að ef við gerum það ekki [gerum hana upp] þá verður henni lokað. Á endanum verður hún rifin niður,“ sagði Trump á miðvikudag. Næsta dag fyrirskipaði alríkisdómari að ekki mætti rífa miðstöðina nema fyrst væri gefinn 30 daga fyrirvari.
