Niðurstöður rannsóknar tveggja vísindamanna gefa til kynna að mæður eigi erfiðara með að eignast sveinbörn en meybörn. Það er meðal annars vegna þess að drengir geta verið stærri við fæðingu en stúlkur og stórir drengir eru líklegri til að fleyta tegundinni áfram.
Sem tegund sem gengur upprétt er maðurinn með þrengri fæðingarveg en önnur spendýr. Um allan heim deyja um 700 manns á degi hverjum af barnsförum. Mörg dauðsföll má rekja til höfuðlags barna sem er stærra en fæðingarvegurinn leyfir.
Vegna þessa hefur lengi verið talið að fæðingar séu hættulegri mannskepnunni en öðrum dýrategundum. Rannsóknin leiddi hins vegar líka í ljós að fleiri tegundir sem fæða börn og fylgju glíma við sama vandamál.
Erfið fyrir móður en góð fyrir tegundina
Mannfræðingarnir Nicole Grunstra og Jonathan C. K. Wells standa að rannsókninni. Þau segja niðurstöðurnar leiða í ljós að ákveðin togstreita sé til staðar hvað varðar fæðingu stórra sveinbarna og kalla það kenninguna um „kostnaðarsömu synina“ (e. the "costly son" hypothesis).
Mun erfiðara er að fæða þá í heiminn. Hins vegar er það tegundinni í hag að koma vörpulegum drengjum á legg vegna þess að þeir verða oftast líka stórir þegar þeir verða fullvaxta og stórir karlar eru líklegri til að eignast fleiri afkomendur.
Sambærilegar niðurstöður hjá fleiri tegundum
Warrener og Grunstra skoðuðu fæðingargögn 140 tegunda. Reyndist barnsnauð við fæðingu karlkyns afkvæma algeng hjá nokkrum þeirra, þar á meðal hjá kúm, vatnabufflum, kindum, geitum og ákveðinni tegund amerískra kappreiðahesta.
Svipað var uppi á teningnum þegar gögn um antilópur og asíska fíla sem haldin eru hjá mönnum voru skoðuð. Ekki var að því hlaupið að rannsaka villt dýr vegna skorts á gögnum. Segja vísindamennirnir þó að fengnar niðurstöður styðji þá kenningu að sveinbörn séu hættulegri mennskum mæðrum í fæðingu.
Barnsnauð, sem á ensku nefnist dystocia, er það ástand sem myndast þegar hægist á fæðingu eða hún stöðvast. Í alvarlegustu tilfellum getur barnsnauð leitt til dauða móður og barns en tölfræðilega er það ekki mjög algengt.
