„Víðtæk og kerfisbundin dráp og misþyrmingar á börnum hafa verið framin á milli 23. október 2023 og 23. október 2025,“ sagði Srinivasan Muralidhar, formaður alþjóðlegrar rannsóknarnefndar Sameinuðu þjóðanna um stöðu mannréttinda á hernumdu svæðunum í Palestínu, það er að segja Gaza, Vesturbakkanum og Austur-Jerúsalem, þegar hann kynnti nýjustu skýrslu nefndarinnar í liðinni viku.
Fjallað var um niðurstöður rannsóknarnefndarinnar í Speglinum á þriðjudag. Hlusta má á þá umfjöllun í spilaranum hér að neðan eða lesa áfram þar fyrir neðan.
Markmiðið með stofnun og starfi rannsóknarnefndarinnar er að reyna að tryggja að alþjóðalög um mannréttindi og mannúð séu virt á þessum svæðum og í Ísrael að auki. Þessi nýjasta skýrsla, sú sautjánda sem frá nefndinni kemur, fjallar sérstaklega um stöðu palestínskra barna á hernumdu svæðunum - og niðurstaðan er blátt áfram hryllingur. Hinn indverski lögmaður og fyrrverandi dómari, Muralidhar, var enda ekkert að skafa utan af því á fréttafundinum.
Segir ísraelska hermenn drepa börn vísvitandi, ekki fyrir slysni
„Rannsóknarnefndin fann óyggjandi sannanir fyrir vísvitandi og markvissum drápum á palestínskum börnum,“ sagði Muralidhar, „pyntingum, ómannúðlegri og niðurlægjandi meðferð, þar á meðal kynferðis- og kynbundnu ofbeldi á palestínskum börnum. Líka fyrir markvissum árásum á innviði sem eru sérlega mikilvægir fyrir börn, svo sem munaðarleysingjaheimili, heilbrigðisþjónustu og skóla.
Í skýrslunni kemur fram að Ísraelar hafi drepið yfir 20.000 börn og sært rúmlega 44.000 til viðbótar í þjóðarmorði þeirra á Palestínumönnum, sem þeir hófu eftir mannskæða hryðjuverkaárás Hamasliða á Ísrael 23. október 2023 - og að þeir séu enn að.
Halda áfram að drepa börn vísvitandi þrátt fyrir vopnahlé
„Jafnvel eftir að samið var um vopnahlé í október í fyrra er enn verið að drepa börn og særa alvarlega,“ sagði Muralidhar, „og Ísraelar halda áfram að hundsa vopnahléið og þá vernd sem börn eiga að njóta samkvæmt alþjóðalögum.“ Og börnin í Palestínu, sagði hann, eru einkum drepin með tvennum hætti.
Börnin eru annars vegar drepin „í loftárásum þar sem notuð eru afar skilvirk sprengiefni, sem hafa áhrif á stórum svæðum,“ sagði Muralidhar, „og í öðru lagi, með notkun árásardróna og langdrægra leyniskytturiffla sem er vísvitandi beint að börnum og þau skotin í höfuðið og efri hluta líkamans.“
Skutu 14 ára dreng og horfðu á hann blæða út
En ísraelskir hermenn víla heldur ekki fyrir sér að drepa palestínsk börn í návígi, eins og ástralski mannréttindalögfræðingurinn Chris Sidoti, sem einnig á sæti í rannsóknarnefndinni, rakti á fréttafundinum. Einhver í ísraelskri eftirlitssveit á Vesturbakkanum, sagði hann, skaut og drap fjórtán ára dreng þar sem hann var að yfirgefa heimili sitt í Al Farah-flóttamannabúðunum á Vesturbakkanum. Sveitin hafði verið þarna á sveimi um hríð, en allt var þar með kyrrum kjörum og engin átök í gangi.
„Hann var skotinn og illa særður og lá á jörðinni,“ sagði Sidoti, „hann var umkringdur flokki ísraelskra hermanna, sem voru að spjalla, og líklega einhverjir þeirra að reykja, í 45 mínútur - á meðan þessum fjórtán ára dreng blæddi út.“
Hundsuðu hjálparbeiðni drengsins og komu í veg fyrir að aðrir hjálpuðu honum
Sidoti segir drenginn hafa sýnt lífsmörk til að byrja með, reynt að vekja athygli hermannanna á því að hann væri lífs en þyrfti hjálp. Þeir hundsuðu allt slíkt, nema hvað þeir stugguðu við honum og lögðu svo stein nærri hönd hans, til að freista þess að útmála hann sem grjótkastara - þótt ekkert bendi til þess að hann hafi verið að gera nokkuð annað en að ganga út fyrir hússins dyr.
Þegar móðir hans freistaði þess að koma syni sínum til hjálpar skutu hermennirnir að henni. Og í hvert skipti sem nærstaddir bráðaliðar reyndu að koma honum til bjargar á sjúkrabíl beindu hermennirnir vopnum sínum að þeim. Til að bæta gráu ofan á svart, segir Sidoti, fjarlægðu þeir lík hans, og hefur því ekki enn verið skilað.
„Það deyr enginn úr glútenóþoli"
Og enn eru ótalin öll þau börn sem dáið hafa úr hungri, vosbúð og sjúkdómum vegna langvarandi lokunar ísraelskra yfirvalda á aðflutning hjálpargagna, hvort sem það er matur, lyf, lækningarvörur eða aðrar nauðsynjar, og vegna tregðu þeirra við að leyfa flutning veikra barna til lífsbjargandi meðhöndlunar utan Gaza.
Þetta á til dæmis við um tólf ára stúlku sem var með alvarlegt glútenofnæmi. „Það deyr enginn úr glútenofnæmi,“ sagði Sidoti, sem sagði dauða stúlkunnar sitja í sér sem skelfilegt dæmi um mannvonskuna sem einkenni framgöngu ísraelskra hermanna og yfirvalda gagnvart fólkinu á hernumdu svæðunum. Fólki, sem þeim beri þó skylda til að vernda, samkvæmt öllum alþjóðalögum um hernað, mannréttindi og mannúð.
„Börn deyja ekki úr glútenofnæmi,“sagði hann, „og það gerði þessi stúlka ekki heldur.“ Hún dó úr hungri, skorti á réttum lyfjum og réttri meðferð. Næring og lyf bárust ekki, og umsókn um heimild til að flytja hana var hundsuð, vikum og mánuðum saman, sagði Sidoti, en barst loks tveimur vikum eftir að hún dó.
Palestínsk börn rænd æskunni og framtíðinni - liður í þjóðarmorði
Allt þetta og mun fleira, sem ísraelskir hermenn og yfirvöld hafa gert á hernumdu svæðunum og rakið er í skýrslunni, hefur ekki bara kostað palestínsk börn líf og limi og ómældar líkamlegar þjáningar, heldur líka valdið þeim stórkostlegum, andlegum skaða, rænt þau allri öryggistilfinningu og framtíðarvonum, valdið þeim tjóni sem fæst þeirra munu nokkru sinni jafna sig á til fulls.
Með því að ræna palestínsk börn æskunni, drepa þau og særa með markvissum hætti af yfirlögðu ráði, hafi Ísraelar jafnframt grefið undan möguleikum palestínsku þjóðarinnar til að lifa af og dafna sem sjálfstæð og fullvalda þjóð. Og þetta, segir í inngangi skýrslunnar, rennir enn frekari stoðum undir ásakanir um þjóðarmorð Ísraela á Palestínumönnum.
„Það er ekki minnsti vafi,“ sagði Sidoti, „enginn sem hefur lesið skýrsluna getur efast um að aðgerðir ísraelskra yfirvalda gegn palestínskum börnum séu brot á öllum alþjóðlegum og lagalegum reglum. Og það verður að láta þau standa reikningsskil gjörða sinna."
