Bandarískir embættismenn eiga í mjög uppbyggilegum samræðum við íranska kollega sína um leiðir til að ljúka stríðinu sem hófst 28. apríl. Donald Trump Bandaríkjaforseti greindi frá þessu í færslu á Truth Social í kvöld og bætti við að viðræðurnar gætu leitt til jákvæðrar niðurstöðu fyrir alla.
Utanríkisráðuneyti Írans tilkynnti formlega fyrr í kvöld að Bandaríkjamönnum hefði verið afhent friðartillaga í fjórtán liðum og þeir hefðu brugðist við henni með milligöngu pakistanskra yfirvalda.
Fulltrúar ríkjanna hafa hist einu sinni í Pakistan frá því vopnahlé komst á 8. apríl og síðan hefur ríkt pattstaða í samningaviðræðum. Íranar hafa haldið Hormússundi í heljargreipum frá upphafi stríðsins og þannig lokað fyrir streymi hráolíu, jarðgass og áburðar til um fimmtungs jarðarbúa.
Um það bil 900 skip sátu föst á Persaflóa í lok apríl samkvæmt upplýsingum AXSMarine, sem fylgist með skipaumferð heimsins. Trump sagði í kvöld að Bandaríkjaher myndi í fyrramálið, eftir ákall fjölda ríkja, taka til við að fylgja skipum gegnum sundið.
Það væri mannúðarmál enda væru matarskortur og hreinlætisvandi tekin að gera vart við sig meðal fjölmennra áhafna skipanna.
Litið verður á öll afskipti Bandaríkjanna af siglingum um sundið sem brot gegn ákvæðum vopnahléssamkomulagsins, að sögn Ebrahim Azizi, formanns öryggismálanefndar íranska þingsins.
Fréttin var uppfærð með viðbrögðum formanns öryggisnefndar Íransþings.
