Umfangsmiklar framkvæmdir eru hafnar við Hlemmsvæðið í Reykjavík þar sem unnið er nú t.a.m. að því að byggja nýtt torgsvæði sem og uppbyggingu borgarlínunnar.
Alþingismaðurinn og fyrrverandi borgarstjórinn Dagur B. Eggertsson segir það mjög sérstaka en jafnframt góða tilfinningu að sjá framkvæmdir hefjast, enda eigi andlitslyfting Hlemms sér langan aðdraganda.
Um er að ræða umfangsmikið verkefni sem felur í sér endurgerð gatnamóta og göturýmis, nýtt torgsvæði og uppbyggingu Borgarlínu á svæðinu og uppsetningu tveggja Borgarlínustöðva á svæðinu.
Í viðtali við mbl.is fer Dagur yfir breytingarnar og áhrifin sem hann telur að þeim muni fylgja.
Staðið yfir í langan tíma
„Andlitslyfting Hlemms hefur náttúrulega staðið yfir í dálítið langan tíma og þetta var eitt það fyrsta sem ég setti á dagskrá þegar ég var formaður skipulagsráðs, kannski asnalegt að segja það, fyrir eiginlega tuttugu árum.“
Segir Dagur að á þeim tíma hafi Hlemmur verið í niðurníslu. Farið hafi verið af stað í skipulagsverkefni sem bar heitið Hlemmur Plús.
„Þá var gert mikið grín að því vegna þess að það vissu allir að Hlemmur væri dauður og að hann ætti sér ekki viðreisnar von en núna er auðvitað komin hérna Mathöllin, sem var svona eitt fyrsta skrefið, fullt af íbúðum hérna í kring, eitthvað um 500 nýjar íbúðir, bankarnir hafa breyst hérna í hótel og síðan er torgið að taka á sig mynd.“
Mjög mikilvægur tengipunktur
Hvaða áhrif myndirðu segja að þetta hafi á lífsgæði þeirra sem búa hérna í Reykjavík og þeirra sem búa á höfuðborgarsvæðinu?
„Ég held að Hlemmur verði svona meiri miðstöð, í ýmsum skilningi, þó að hann hafi svo sem alltaf verið það. Það eru ekki margir sem átta sig á því hvað það fara margir íbúar um hérna á hverjum degi. Það var talið árið 2018 og á hverjum degi fóru um 23.500 manns um Hlemmsvæðið og Hlemmtorg gangandi, 1.400 manns á hjóli og 7.000 akandi. Þannig að þetta eru yfir 30.000 manns á dag. Það gerir þetta auðvitað að mjög sérstökum stað og mjög mikilvægum tengipunkti og þess vegna verður frábært að sjá Borgarlínuna koma hérna.“
Jákvætt umbreytingarverkefni
Þá segir Dagur Borgarlínuverkefnið einnig vera jákvætt umbreytingarverkefni fyrir höfuðborgarsvæðið allt.
„Með borgarlínuframkvæmdunum koma ekki bara sérakreinar til að keyra á heldur stöðvar sem eru aðgengilegri fyrir þá sem glíma við hreyfihömlun eða eru blindir. Þetta er bara fullkomið aðgengi. Það kemur líka gróður og svona vistlegra umhverfi þannig að þetta er svona umbreytingarverkefni fyrir borgina.“
„Hér á Hlemmi þar sem við horfum þá var þetta náttúrulega gamla leiðin inn í Reykjavík og elsta kaffihús borgarinnar var hérna, Laugavegur 125, ef ég man það rétt. Það heitir Norðurpóllinn og hefur verið í endurgerð á athafnasvæði og húsið var flutt héðan fyrir nokkrum árum og mun koma aftur hingað, væntanlega bara í sumar. Hér verða þá líka einhverjir matarvagnar og útiaðstaða þannig þetta verður svona algjört lífsgæðasvæði.“
