Steikjandi hiti er víða í Evrópu vegna hitabylgju. Rauð, appelsínugul og jafnvel fjólublá viðvörun hefur verið gefin út víða vegna hitans. Fólk hefur týnt lífi í ám og vötnum þegar það hefur reynt að kæla sig.
Í Frakklandi hafa að minnsta kosti 40 drukknað í ám og vötnum undanfarna daga. Yfirvöld biðja fólk að vera ekki að stinga sér til sunds á eftirlitslausum svæðum. Í gær fundust tvö börn, tveggja og fjögurra ára, látin í bifreið foreldra sinna í bæ í Suður-Frakklandi. Dánarorsök hefur ekki verið staðfest en talið er líklegt að börnin hafi dáið úr hita.
Og það versta er ekki enn yfirstaðið. Á Ítalíu er búið að gefa út rauða viðvörun í fimmtán borgum. Sams konar viðvörun er í gildi víðast hvar á Spáni og í Frakklandi. Í Suður-Englandi gæti hiti náð 38 stigum á næstu dögum og varað er við hitabeltisnóttum — sem þýðir að hitinn fer aldrei niður fyrir 20 stig.
Það er og verður einnig steikjandi hiti í Þýskalandi, Portúgal og Sviss og hitinn á ekki að lækka fyrr en líður á vikuna.
Í þessum aðstæðum er að ýmsu að huga og Spegillinn heyrði í nokkrum Íslendingum sem búa þar sem hitinn er hvað mestur.
„Þegar hitinn er yfir líkamshita þá eiginlega bara fer allt í skrall“
Kristín Jónsdóttir, einnig þekkt sem Parísardaman, býr í París í Frakklandi. Hún segir hitabylgjuna hafa byrjað mjög snemma þetta árið. Þetta sé ógn sem íbúar bíði eftir á ári hverju.
„Fyrsta hrinan kom í maí og nú erum við í annarri hrinunni og hún er ansi slæm. Það var slegið hitamet í Frakklandi í nótt, aldrei mælst jafn hár hiti yfir allt Frakkland eins og gerðist í nótt. Við fáum heldur betur að finna fyrir því að við sem búum í þéttbýlinu langt frá sjó eins og við hér í París.“
Kristín segir yfirvöld standa sig mjög vel í því að upplýsa íbúa um hvað eigi að gera í hitanum. Þá eru vatnskranar mjög víða og borgaryfirvöld hafa opnað ráðhús borgarinnar fyrir fólkið.
„Þegar hitinn er yfir líkamshita þá eiginlega bara fer allt í skralli og mann langar helst bara ekki að gera neitt. Þetta er náttúrulega ágætis afsökun einmitt fyrir því að gera ekki neitt. Sitja bara hérna eins og ég geri núna.“
Fjólublá veðurviðvörun og raforkuverð rýkur upp úr öllu valdi
Gréta Sigríður Einarsdóttir, fréttamaður Ríkisútvarpsins, er í Frankfurt í Þýskalandi. Þar hefur verið 35 stiga hiti síðan á föstudag.
„Mér skilst að þetta sé nú þegar heitasti júnímánuður sem hefur mælst í Þýskalandi. Það verða hins vegar enn fleiri hitamet sem munu falla því á föstudaginn er spáð 40 gráðu heitu veðri og hingað til hefur hæsti hiti sem mælst hefur í júnímánuði 39,6 gráður, og það er einmitt hér í Frankfurt sem verður á laugardaginn 40 stiga hiti ef sú spá gengur eftir.“
Fjólublá viðvörun er í gildi vegna hita, það er hæsta stig viðvörunar þar í landi. Hættan á gróðureldum er talin mikil.
„Hitinn er að sjálfsögðu ekki bara hættulegur skóglendi heldur líka mannfólki og eldra fólki - það er búið að vara eldra fólk við því að það eigi að halda sig inni í hitanum og alla þá sem eru veikir fyrir.“
Gréta segir loftkælingu ekki staðalbúnað í Frankfurt. Þess vegna hafi margir keypt sér að minnsta kosti eina viftu síðustu daga.
„Og þetta hefur þau áhrif að raforkuverð hérna í Suður-Þýskalandi einna helst hefur verið að rjúka upp úr öllu valdi. Af því að það bregst við þegar notkunin er mikil eða þegar framleiðslan er lág og þá hækkar verð eftir því.“
Fólk svolítið stressað
Næst liggur ferðin til Rómar á Ítalíu. Þar býr Marta Brancaccia Snæfríðardóttir. Þar er 36 stiga hiti og á að fara upp í 40 stig yfir helgina. Slíkt hitastig sé eðlilegt í ágúst.
„En munurinn er sá að í ágúst er eðlilegt að fólk fari úr bænum, það er eiginlega enginn lókal sem verður eftir í Róm í ágúst. Það fara allir á ströndina eða upp í fjöll til að flýja hitann.“
Margir hafi ekki tök á því að flýja hitann. Fólk þarf að mæta til vinnu og halda áfram með lífið. „Róm er líka mjög formleg borg. Það þýðir að fólk þarf að klæðast jakkafötum og formlegum fötunum til að mæta í vinnu. Það er alveg á erfitt að búa hérna með traffíkinni og stressinu og öllu og þið getið ímyndað ykkur hvernig það er í þessum hita.“
Marta segir fólk svolítið stressað. „Þetta er búið að vera mjög erfitt, ég verð að viðurkenna það. Það er eiginlega bara varla hægt að anda. Ég veit ekki hvort þið sjáið það en ég er að bíða hérna eftir hellidembu. Það er búið að vera mikil rigning og alveg bara stormar inn á milli af því að það er svo heitt. Það eru alveg eldingar og læti, ég er að bíða eftir því akkúrat núna.“
Lítið sé hægt að gera í hitanum og fólk verði að halda áfram með daglegt líf. „Okkur er sagt að halda okkur inni þegar mesti hitinn er en hann er alltaf. Það er bara heitt frá morgni til kvölds. Og eins og ég segi ekki allir sem hafa tök á því að vera inni. Þannig að já þetta er bara mikið áhyggjuefni af því ef þetta svona í júní þá erum við svolítið stressuð fyrir ágúst, júlí og ágúst. Við getum ekki alveg ímyndað okkur hvernig þetta verður í ár.“
Allur ís búinn og kælar tómir
Annnalísa Hermannsdóttir býr í Lundúnum í Bretlandi þar sem hún stundar nám. Hún ákvað að fara á hjóli í skólann í morgun frekar en fara í neðanjarðarlestina í hitanum.
„Fólk er bara smá að deyja úr hita og allur ís er búinn í búðunum, allir kælar tómir. Svo á þetta víst að vera enn þá verra á morgun en við drekkum nóg af vatni hér.
